A popular carreira Coruña 10 xa ten data e percorrido para a súa vindeira edición. Será o 24 de abril co circuíto máis rápido da historia da proba, que percorre 10 quilómetros ao longo da cidade herculina.
Na presentación estiveron a concelleira de Deportes, Mónica Martínez, así como o presidente da Federación Galega de Atletismo
A C10, segundo indicou no acto a concelleira, é a “proba máis popular e asequible” para as persoas afeccionadas ás carreiras populares. Malia contar con participantes non profesionais, é destacable o alto nivel de corredores e corredoras que sempre se presentan a esta proba. Esta será a segunda Coruña 10 tras a crise sanitaria despois da proba do mes de outubro e que serviu de anticipo do retorno á Coruña das carreiras populares.
Durante o acto de presentación destacouse o gran número de atletas inscritas e inscritos ata o momento o que pon de de manifesto a consolidación e importancia desta clásica no calendario de ruta en Galicia.
Un novo percorrido
A nova edición desta competición ven con novidades. Entre elas destaca un novo percorrido, máis plano e propicio para establecer boas marcas. “Será a C10 máis rápida da historia“, apuntou Mónica Martínez.
Os responsables aseguraron que esta nova Coruña 10 consolídase como unha das mellores carreiras de 10 quilómetros a nivel nacional. O circuíto conecta as dúas contornas mariñas da cidade, a baía do Orzán e a zona portuaria.
O obxectivo para establecer esta ruta foi procurar a mellor orografía de ambas as zonas e que a carreira atravesase algúns dos puntos máis emblemáticos da Coruña, facilitando ao mesmo tempo a visibilidade para o público.
Por outra banda, o percorrido pasa tamén por parte das instalacións dos peiraos, que proximamente quedarán abertas á cidadanía. Esta zona é idónea para este tipo de probas pola súa planimetría. A saída e a meta estarán instaladas no paseo do Parrote. Alí recuperaranse tamén as competicións de menores, desde os sub18 ao máis pequenos, tras a súa ausencia desde o inicio da pandemia.
Carreira solidaria
Por outra banda, despois da carreira levarase a cabo unha actividade solidaria co pobo ucraíno, aberta ás persoas participantes e a aquelas interesadas en facer deporte e contribuír á recadación de fondos para a ONG AGA Ucraína. A actividade escollida é a zumba e todas as inscricións e doazóns poderanse facer a través de carreirasgalegas.com.
Como inscribirse na Coruña 10?
Desde este xoves é posible facer a inscrición presencial nos departamentos de Deportes de El Corte Inglés da Coruña, Santiago e Vigo. Pero tamén é posible apuntarse de maneira online a través de carreirasgalegas.com.
O custo é de 6 euros ata o 10 de abril, 10 euros do 11 ao 17 de abril e 20 euros os días 18 e 19 de abril. As categorías inferiores son gratuítas.
A Coruña 10 repartirá un total de 9.700 euros en premios, condicionados á obtención dunha marca mínima. Haberá un premio adicional de 1.000 euros para a persoa que bata o récord da carreira, establecido en 28 minutos e 9 segundos na categoría masculina e 31 minutos e 40 segundos na feminina.
Ademais, a Coruña 10 vén con outra novidade: O desconto do 10 % para todas as persoas que se trasladen en tren á Coruña para participar na C10, grazas a un convenio asinado entre o Consorcio de Turismo e RENFE. As persoas interesadas deberán solicitar á organización no momento da súa inscrición o bono para trens AVE e Larga Distancia.