Na Copa da Raíña de voleibol 2021 non hai ningún equipo galego entre os competidores. Porén, o talento galego estará ben representado con ata sete galegas nos seis equipos que disputan o torneo.
As Palmas de Gran Canaria será o escenario da Copa desde este venres, 26 de febreiro, ata o domingo, día 28. Nela loitarán polo título o Avarca de Menorca, Sanaya Libby’s La Laguna (Haris), CV CCO 7 Palmas (Olímpico), Feel Voley Alcobendas, OSACC Haro Rioja Voley e CV Kiele.
E dentro destes planteis é onde atopamos ás nosas xogadoras. Catro delas proceden da Coruña, e xogan nos dous equipos canarios. Helia González e Lucía Varela compiten coas cores do Olímpico e Patricia Suárez e Emma Ordóñez no Haris.
As primeiras, anfitrioas do torneo, estrean a Copa na primeira final de cuartos, contra o CV Kiele. Este equipo é o único que non conta con ningunha galega no seu plantel. O partido disputarase o venres, ás 16:30 horas.
De clasificarse para as semifinais, estas galegas poderán competir contra outras coruñesas. O Haris está clasificado directamente para esta fase, polo que competirá por un posto na final co gañador do duelo Olímpico-Kiele. E neste outro conxunto canario é onde xogan Patricia Suárez e Emma Ordóñez.
No outro lado dos cruces, nos cuartos que enfrontan a Haro Rioja e Voley Alcobendas tamén haberá representación galega. No primeiro deles compite Carmen Saá, lucense formada nas categorías inferiores do CV Arenal Emevé. Enfronte estará a viguesa María Alejandra Álvarez del Burgo, colocadora e capitá do Alcobendas.
O vencedor deste duelo competirá co Avarca Menorca en semis, xa que as menorquinas tamén contan cunha clasificación directa. No equipo das Baleares estará outra lucense, a tamén formada na canteira do Emevé, Sara Folgueira.
Consulta toda a información sobre a Copa nesta ligazón.
Helia González, MVP do 2013
A galega Helia González, actualmente no Olímpico, ten xa experiencia e éxitos na Copa da Raíña. No ano 2013, cando militaba co Haro Rioja Voley, foi elixida a mellor xogadora da competición.
Antes de recalar no equipo canario, González formou parte do desaparecido May Deco Logroño, un dos habituais desta competición.
