- A xogadora checa Julie Pospisilova xogará a próxima tempada nas filas do BAXI Ferrol despois de chegar á un acordo co club departamental.
A xogadora, que o dia 20 de xuño cumprirá 24 anos e mide 1.82 metros, procede da Universidade de Wisconsin, na que xogou as catro últimas campañas, promediando este ano 14.1 puntos, 5 rebotes e 4,2 asistencias.
Antes de iniciar a súa etapa universitaria en Estados Unidos, Julie Pospisilova debutou na Euroliga, co Praga, cando tiña 19 anos, segundo informa o BAXI Ferrol.
A deportista checa pode actuar en varias posicións e foi internacional en todas as categorías do seu país, incluíndo a selección absoluta coa que debutou o pasado ano.
O adestrador do equipo ferrolán, Lino López, destaca sobre a nova incorporación do cadro departamental que “Julie é unha xogadora nova que afrontará a súa primeira experiencia profesional e ten moitas ganas de crecer. Ela é moi polivalente, entende moi ben o xogo e ten unha gran capacidade de pase e facer mellores ás compañeiras. Polas súas características e mentalidade seguro que se adaptará moi pronto ao xogo do equipo”.
Desta forma, coa fichaxe de Julie Pospisilova o equipo xa dispón de nove xogadoras tras anunciar a continuidade de Claudia Soriano, Jessica Fequiere, Marta Gómez, Marianne Kalin e Ángela Mataix, así como as fichaxes de Gala Mestres, Rachel Howard e Anniina Aijanen.
Campaña de abonados do BAXI Ferrol
Ademais, segue aberta a campaña de abonados para poder renovar ou darse de alta. Polo momento, renovaron o seu abono 537 persoas, mentres que se produciron 58 altas.
Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 15.00 e de 18.00 a 22.00 horas. Tamén se poden facer as xestións a través do correo electrónico abonadosuniferrol@gmail.com
