O vindeiro 23 de outubro, A Coruña ten unha cita con ENKI. A entidade celebra coa Fundación Abrente un ano máis a súa carreira, que no 2021 terá modalidade presencial e online. Os 4.000 dorsais para a primeira delas esgotáronse en cuestión de horas. Na segunda, as persoas participantes completarán o percorrido desde casa.
A carreira presentouse este mesmo martes da man de Ángel López, presidente de ENKI, e a concelleira de Igualdade Yoya Neira. No acto tamén participaron a concelleira de Deportes, Mónica Martínez; Jacobo Garrido, nadador paralímpico participante nos Xogos de Toquio e embaixador ENKI; Xabier Casal, responsable da Actividade Física Saudable da Fundación María José Jove; e Rubén Riaño, director de Institucións de CaixaBank.
Ángel López sinalou na presentación que o acto era moi importante e necesaria despois do vivido, “unha carreira que non só visibiliza o que facemos durante o ano senón que lle dá voz ás entidades sociais e supón un punto de encontro entre o terceiro sector e a sociedade”. O responsable confesou que nesta convocatoria non sabían como ía reaccionar a xente despois da última edición virtual, mais que a resposta non puido ser mellor ao esgotarse os 4.000 dorsais nunha tarde.
Aposta pola inclusión social
“As administracións non só temos que apoiar este tipo de acción, senón poñer en marcha políticas a favor da inclusión social. Precisamente nesta cita lúdica coinciden tres eixes da nosa acción de goberno: o fomento do deporte e as políticas social e de accesibilidade”, asegurou a concelleira Yoya Neira.
Neira asegurou que canto á mobilidade, Coruña Camiña vertébrase na conversión das rúas coruñesas en lugares amables e accesibles, nos que a cidadanía sexa protagonista: “Realizamos 35 intervencións de máis de 7,5 millóns de euros para mellorar a seguridade da veciñanza e que as paradas de bus non teñan barreiras arquitectónicas. As actuacións van dirixidas a ampliar as beirarrúas para que permitan o paso de cadeiras de rodas e a facer dos barrios lugares de convivencia e que todos conten con equipamentos básicos”.
📢O Concello celebra a volta presencial da carreira Enki2021 de obstáculos pola integración (chío 1/2) pic.twitter.com/3yW1U3Y3qP
— Concello da Coruña (@ConcelloCoruna) September 28, 2021
Ademais, lembrou que o Concello asinou un convenio con ENKI e a Fundación Abrente para que os parques infantís da cidade sexan inclusivos e que en todas as obras que executamos desde o verán seguimos os criterios marcados pola Fundación Abrente: “Traballamos nunha guía que constate todo o que avanzamos e o que queda por facer neste tipo de infraestruturas para os máis cativos”.
A concelleira afirmou que a carreira ENKI converteuse, ao longo das súas oito edicións, nunha das mellores iniciativas do país para berrar a favor da integración de todas e de todos, unha proba divertida que a organización decidiu unificar en 2018 nun só evento co fin de provocar un maior impacto: “Conseguiuno, porque ese mesmo ano inscribíronse 7.500 persoas e na última convocatoria presencial, a de 2019, alcanzouse o récord de 10.000 persoas, o que a converteu na máis multitudinaria de Galicia”.
Yoya Neira engadiu que esta iniciativa confirma ano a ano que hai esperanza, e puxo como exemplo o proxecto Down Café, que puxemos en marcha coa Asociación Down Coruña. Un programa sen precedentes no que as persoas con diversidade funcional que están ao fronte do Quiosco da praza de Ourense están a amosar que estas iniciativas de inserción laboral son exitosas.
Por último, convidou as coruñesas e coruñeses a esquivar as barreiras que aínda impiden esa igualdade real pola que traballamos e agarda que o día 23 –tamén nas redes-, A Coruña fique chea de perrucas e disfraces, de obstáculos enxeñosos e outfits extraordinarios nunha gran festa pola inclusión.
