A vindeira fin de semana arranca a competición oficial para o Dépor ABANCA na Liga Reto Iberdrola. Nesta pretempada, o club branquiazul viu como as futbolistas da canteira daban pasos cara adiante. Miguel Llorente deulle minutos a un total de 9 deportistas da canteira herculina.
Se cadra, o dato máis destacable da pretempada deportivista é que as categorías inferiores do club veñen pisando forte. Botando contas, nove canteirás tiveron minutos de xogo repartidos nos diferentes amigables disputados polo Dépor ABANCA:
- Reigosa
- Paula Novo
- Tati
- Aroa Guerra
- María Figueroa
- Paula Monteagudo
- Nuria
- Marta Rico
- Noela
O Deportivo ABANCA puxo fin á pretemporada cun último amigable o pasado sábado en Portugal. Por diante queda a competición ligueira en Reto Iberdrola (a segunda categoría nacional), coa súa primeira xornada o domingo 5 de setembro ás 12:00 en Abegondo fronte ao FC Barcelona B (pendente de confirmación oficial).
Atrás, tal e como lembran desde o club, quedan cinco partidos amigables marcados polo potencial dos adversarios e a masiva presenza de canteirás en adestramentos e nos mesmos encontros de preparación.
Tan só un dos rivais aos que se mediu o conxunto de Miguel Llorente, o Viajes InterRías FF, era de inferior categoría. E así e todo, o conxunto de Sanxenxo é un dos clubs punteiros do grupo 1º de Primeira Nacional.
Os demais exames de pretemporada foron diante equipos da mesma categoría, tales como o Oviedo Moderno CF; ou de superior, caso da Real Sociedade (Primeira Iberdrola) ou o Valadares Gaia FC e o Sporting Braga Feminino, ambos equipos da potente Liga BPI de Portugal.
Números pobres, e sensacións boas no Dépor ABANCA
O balance nestes cinco partidos foi dunha vitoria, un empate e tres derrotas, con 2 goles a favor (os dous de Jone Ibáñez ‘ Ibi’) e 9 en contra. Os números son pobres, pero as sensacións que o equipo branquiazul deixou no campo si foron boas.
O equipo deportivista, aínda en construción pola alta cantidade de novas incorporacións, deixou bo sabor de boca co seu xogo en varias fases de todos os partidos. Por exemplo, diante do Valadares Gaia FC no transcurso do Trofeo Teresa Herrera no Estadio ABANCA-RIAZOR.
A pretemporada do Dépor ABANCA transcorreu con estos rivais e resultados:
- Deportivo ABANCA 0 – Valadares Gaia FC 0. A penaltis: 4-5 (IX edición do Trofeo Teresa Herrera)
- Viajes InterRías FF 0 – Deportivo ABANCA 1 ( Jone Ibáñez ‘ Ibi’) (Trofeo Concello de Sanxenxo)
- Real Sociedade 4 – Deportivo ABANCA 0
- Deportivo ABANCA 0 – Oviedo Moderno CF 1
- Sporting Braga Feminino 4 – Deportivo ABANCA 1 (Jone Ibáñez ‘ Ibi’)
