Coa campaña 2021-22 serán doce as tempadas de Carla Fernández no CB Arxil. A deportista vén de renovar o seu compromiso coa entidade pontevedresa. Trátase dunha xogadora fundamental no sistema de Maite Méndez e a outra capitá do CB Arxil.
Faríase raro ver o número nove da camiseta do CB Arxil noutra xogadora que non sexa Carla Fernández. Facendo honra a ese dorsal, a base cumprirá a súa duodécima tempada no club pontevedrés, co que acumula xa máis de 350 partidos de Liga, aos que hai que sumar as copas Galicia e os amigables.
Trátase dunha xogadora imprescindible nos esquemas da adestradora do CB Arxil, Maite Méndez, nas últimas tempadas. Esta viguesa de nacemento e pontevedresa de adopción chegou á cidade do Lérez procedente do Carmelitas no curso 2010-2011. Antes xa tiña xogado en categorías inferiores no Seis do Nadal e Celta e desde entón fíxose co agarimo da afección verde, especialmente pola súa calidade, o seu carácter gañador e, sobre todo, o compromiso que ten co CB Arxil, xa que en moitas ocasións xogou con molestias ou mesmo lesionada e sempre estivo dispoñible para o equipo.
A pasada tempada xogou 787 minutos na liga regular, anotando 167 puntos, con 91 rebotes recolleitos, 55 balóns recuperados, 46 asistencias e unha valoración de 107 en 26 partidos.
A súa progresión é indubidable e a súa achega imprescindible. Dicir Carla Fernandez é dicir unha xogadora que ten o corazón verde.
Maite Méndez e Carla Fernández un tándem que aposta ao verde
Carla Fernández apostou polo CB Arxil hai xa once tempadas e Maite Méndez tamén o fixo por ela. Xuntas foron un binómio que foi crecendo co paso das tempadas coas súas eternas compañeiras Lago, Díaz-Pache e as xogadoras de casa Aldara, Noa,Marga, Adriana, Violeta son pezas imprescidibles no club pontevedrés.
Lino Vázquez destaca de Carla Fernández que é do Arxil para o bo e o malo. Cando se precisa, Carla saca o seu caracter gañador e competitivo e é unha das que tira do equipo para conseguir saír a diante.
Sobre a cancha, Carla Fernández é unha xogadora que conta cunha boa porcentaxe en tiros de tres, rebotea moito, é forte en defensa e en ataque gústalle correr. Sen dúbida, é unha das deportistas que lidera o equipo na cancha e que seguirá facéndoo esta campaña na LF2.
