A xogadora americana Taylor Koenen formará parte do plantel do BAXI Ferrol para a vindeira tempada 2021/2022, competindo na LF Endesa. A nova ala-pivote do club galego asegurou sobre o seu novo conxunto que “o éxito previo do equipo fala por si só”.
A xogadora de 23 anos chega procedente do Friburgo, da liga suíza, co que logrou o título ligueiro, ademais de participar na Eurocup, onde promediou 15,2 puntos, 6,2 rebotes e 2,6 asistencias. Con anterioridade, Koenen competiu na Universidad de North Caroline, onde se formou durante catro anos, tendo un papel destacado no bloque universitario.
Koenen alaba ao seu novo club
Á súa chegada, Taylor Koenen afirmou que “o adestrador non só recluta a boas xogadoras, senón que tamén a boas persoas e iso é moi importante para min. Sempre escoitei o bonito que é Ferrol e o xenial que é a súa xente. Estou desexando incorporarme ao equipo”.
A estadounidense mostrouse emocionada pola súa futura participación na máxima categoría española, que califica como “moi respetada e moi competitiva. Estou emocionada por poder competir con algunhas das mellores xogadoras do mundo”.
No relativo ao seu aporte ao grupo, a xogadora considera que engadirá “a miña paixón polo xogo, a miña vontade de gañar e o meu desexo de ser mellor. Traballo constantemente no meu xogo, nunca me conformo. Teño moitas ganas de xogar en España”, recalca.
Taylor Koenen: “Estou encantada de unirme á familia do BAXI Ferrol e prométolles dar o mellor de min cada día”
Cara a afección, a ala-pivote declarou que “estou encantada de unirme á familia do BAXI Ferrol e prométolles dar o mellor de min cada día. A miña paixón e competitividade é insuperable”.
Taylor Koenen é a décima xogadora confirmada do proxecto do BAXI Ferrol para disputar a Liga Endesa, tras as renovacións de Jenna Allen, Natalia Rodríguez, Patri Cabrera, Suné Swart, Dynn Leaupepe e Irene Garí, ademáis das fichaxes da madrileña Carmen Grande, a serbia Milica Ivanovic e a catalá Alicia Villegas.
Y la décima integrante del BAXI Ferrol 2021-22 será…#SienteElUni pic.twitter.com/3w0AZMu9Fn
— Baxi Ferrol (@UniFerrol) June 10, 2021
