A AD Cortegada viaxou ata terras navarras para dar comezo á segunda volta da Liga Feminina 2 no que foi o primeiro partido do 2021, ante un Osés Construcción Ardoi que pola calidade do seu xogo ocupa a segunda posición da categoría.
As diferenzas no nivel de galegas e navarras non quedaron patentes sobre a pista, onde se puido ver un duelo competido, pero con vitoria final para o Ardoi cun 75-64.
Mantendo o ritmo
O partido comezou dominado polo conxunto visitante, que se adiantaba cun parcial de 2-6 nos primeiros minutos do cruce. Pouco durou esa situación, xa que a dous minutos do final, o Osés Construcción Ardoi colleu o mando do partido e deulle a volta ao resultado, situándose por diante cun parcial 8-1 que rematou sendo o 16-11 co que se pecharía o primeiro cuarto.
Con todo, as xogadoras dirixidas por Javier Nogueira mantiveron o ritmo das navarras, respondendo ás súas canastras e impedindo que se marchase do marcador por unha gran diferenza.
De todas formas, o nivel das locais seguía a ser superior ca o das súas rivais. No segundo parcial, o Ardoi logrou situarse a 17 puntos das galegas, a un par de minutos da pausa. Pero o equipo de Vilagarcía de Arousa non baixou os brazos e os tantos de Sara Gómez, Míriam García e Irene Montenegro meteunas no partido de novo.
Aínda que o Cortegada non chegaba a situarse por diante, si que soubo reducir as distancias, perdendo de menos de dez puntos ao descanso, deixando aberta a posibilidade da remontada.
O partido fóiselle ao Cortegada no terceiro cuarto
Pero o paso por vestiarios non xogou a favor das visitantes. As navarras saíron con forza ao inicio da segunda metade e aproveitaron o cansancio dun Cortegada escaso en rotacións.
Cris Loureiro e Zeltia Presas botáronse ao seu equipo ao lombo, pero nada puideron facer para ser quen de frear a un Osés Construcción Ardoi que comezaba a sentenciar a vitoria.
A falta de dez minutos para o final, as galegas xa perdían de 17 puntos e tiñan poucas perspectivas de lograr gañar. O último cuarto comezou coas locais aumentando a xa gran diferenza ata os 22 puntos, pero isto non foi motivo para o abandono das de Vilagarcía.
Malia que os dous puntos do triunfo estaban xa fóra do seu alcance, as xogadoras do conxunto da AD Cortegada puxeron sobre a pista toda unha demostración de esforzo e compromiso polas cores que defende. as deportistas loitaron ata o último balón que se puxo en xogo e presionaron en ataque. Esa actitude ante a escuadra rival foi o que lles permitiu recortar distancias coas contrarias. Finalmente, a derrota das deportistas galegas consumouse cunha diferenza de 11 puntos, tras un último tempo no que as visitantes dérono todo baleirándose sobre o parqué. O marcador final deste encontro da Liga Feminina 2 foi de: 75-64.
Difícil reto para a próxima xornada
O primeiro partido en casa do 2021 para a AD Cortegada será ante o mellor equipo da LF2, o BAXI Ferrol. As galegas xogarán o próximo sábado, 9 de xaneiro, ás 19:30 horas.
FICHA TÉCNICA
75) OSÉS CONSTRUCCIÓN ARDOI: Eva Cases (10), Diana Cabrera (8), Tamara Montero (15), Itziar Arregui (8) e Josephine De Barros (9) – quinteto titular -. Tamén xogaron: Marcos (-), Alazne Vicente (9), Iranzu Echeverria (2), Deborah Ayela (12), Tollar (2) e Vázquez (-).
64) AD CORTEGADA : Patricia Vicente (18), Sara Gómez (16), Lorena Castro (-), Cris Loureiro (8) e Sedlakova (9) – quinteto titular -. Tamén xogaron: Zeltia Presas (2), Míriam García (4) e Irene Montenegro (7)
PARCIAIS: 16-11, 19-15, 23-15 e 17-23.
ÁRBITROS: Jesús Criado García e Enrique Morgades Prat. Sinalaron un total de quince faltas persoais ao Osés Construcción Ardoi e 19 á AD Cortegada.
INCIDENCIAS: Partido correspondente á décimo cuarta xornada daLiga Feminina 2de baloncesto disputado no pavillón Maristas de Sarriguren (Navarra).
