O CB Arxil recibe na Copa Galicia de baloncesto no CGTD de Pontevedra á AD Cortegada. O partido ten limitado o aforo a 60 persoas máximo na bancada por mor do protocolo de prevención da COVID-19.
A falta dunha semana o comezo da competición na liga Feminina 2, o CB Arxil disputa este sábado 26 de setembro no pavillón do CGTD a partir das 19,30 o seu segundo partido oficial da tempada 20-21 ante a AD Cortegada.
O CB Arxil que regresou a adestrar no pavillón do CGTD este xoves e reencontrouse coa súa cancha habitual de xogo, recibirá ao Cortegada cunha novidade de ter uns 60 afeccionados na bancada, onde haberá representación da directiva do club visitante.
O protocolo para este tipo de encontros consistirá, según explican desde o CB Arxil, en levar “unha listaxe de todas as persoas que accedan ao campo, xel, máscara, manterse a distancia de seguridade entre afeccións e toma de temperatura. Pero a noticia positiva é que o baloncesto de competición nacional volve a Pontevedra”, din desde o club con optimismo.
Novas caras no Cortegada e no Arxil
Pero e a pesar de ser un encontro de Copa Galicia o CB Arxil presentará en Pontevedra as súas novas incorporacións: Sara, Noelia e Bineta que sumadas ás xa clásicas xogadoras verdes: Lago, Carla, Cris, Fortster, Aldara, Violeta, Noa e Margarita cambiaron a estrutura do equipo. Agora estamos diante dun “grupo máis físico e con máis recursos que a pasada tempada”, aseguran desde o equipo pontevedrés. A estas xogadoras hai que sumar que Natalia entrará no quecemento do equipo.
A AD Cortegada recupera á súa gran capitá tras un parón por motivos persoais, Sara Gómez, e fichou a Sedlakova e a Saric. Mantén a Loureiro, Mirian, Valiente, Centeno, Zeltia, Castro, Ríos, Montenegro e Blanco.
