O AD Cortegada precisaba unha fazaña para vencer ao sexto clasificado e asinouna gañando no tempo extra ao GDKO Ibaizabal (75-72).
Malia a ampla diferenza na táboa antes desta vixésima xornada, na que sete postos separaban a vascas e galegas, as segundas foron capaces de demostrar na pista por que merecen seguir na Liga Feminina 2.
O Cortegada soubo repoñerse dun mal inicio
As primeiras xogadas do partido parecían indicar un desenlace moi distinto ao que se veu finalmente. O GDKO Ibaizabal saiu á cancha de Vilagarcía de Arousa coa confianza de vir dunha racha de catro vitorias e os galóns de formar parte da metade superior da clasificación.
Así, dominaron sen demasiados problemas no primeiro tempo, logrando unha vantaxe sobre as locais de sete puntos. Porén, ao verse por debaixo, as de Nogueira reaccionaron.
No segundo cuarto, as galegas foron quen de invertir o marcador, freando por completo o ataque visitante, que só foi quen de marcar cinco puntos neste tempo. Pola contra, o AD Cortegada sumou once puntos máis, estando peor en ataque respecto ao primeiro parcial, pero moito mellor en defensa.
Á volta do descanso, a igualdade e tensión crecía no pavillón de Fontecarmoa. Ambos equipos crecéronse en ataque, sumando puntos aos seus casilleiros sen descanso, pero sen deixar que o rival se escapara. O bastón de mando cambiaba dun conxunto ao outro, e así chegaron os que serían os dez minutos finais de partido, ou non.
O marcador informaba do 50-49 a favor das galegas, pero o plantel do GDKO Ibaizabal non ía deixar que as entón penúltimas clasificadas se levasen a vitoria.
O cuarto tempo mantivo a igualdade no nivel de xogo e no luminoso, entre dous equipos que se alternaban baixo o aro. Finalmente, as vascas presionaron o suficiente para poñer o empate sobre o electrónico, pero o tempo se acababa e tras 40 minutos aínda non había un gañador.
Foi necesario un tempo extra, pero chegou a vitoria
Así chegou o tempo extra, no que o Cortegada foi quen de desmarcarse no partido. En contra de todo pronóstico, o conxunto local foi capaz de asinar o seu trunfo. Cun 15-12 neste quinto cuarto, as galegas suman dous puntos importantísimos para seguir con opcións de salvar a categoría.
Ao longo do partido as galegas foron letais desde a liña do tiro libre, cunha efectividade do 95%. Esta foi a única área na que as xogadoras do Cortegada foron superiores, pero os 19 tantos transformados desta forma leváronnas á vitoria.
Outra das claves do encontro foi a maneira na que o equipo de Nogueira conseguiu inmobilizar a xogadoras da talla de Juana Molina. Esta foi a máxima anotadora do seu equipo con 17 tantos, pero quedou lonxe de Sara Gómez para as azulonas, que sumou 27 canastras.
FICHA TÉCNICA
75) AD CORTEGADA: Vicente (11), Sara Gómez (27), Lorena, Loureiro (13), González (7) e Sedlakova (11) -quinteto inicial -. Tamén xogaron: Presas (6), García (-), Castro (-) e Wanyama (-).
72) GDKO IBAIZABAL: Molina (17), Ramasco (5), Tulonen (12), Koskimies (15) e Vázquez (2) – quinteto inicial -. Tamén xogaron: Arrien (2), Iruskieta (-), Aizpurua (3) e Cotano (16).
PARCIAIS: 16-23, 11-5, 23-21, 10-11 e 15-12.
ÁRBITROS: Fernández Requejo e Esteban Domínguez.
INCIDENCIAS: Partido de baloncesto correspondente á 20ª xornada da Liga Feminina 2 disputado no pavillón de Fontecarmoa en Vilagarcía de Arousa. O partido xogouse se público nas bancadas por mor das restricións aplicadas pola Xunta de Galicia aos eventos deportivos que teñen coma obxectivo para previr o contaxio da COVID-19 na nosa comunidade.
