O trío de partidos galegos da xornada 15 de Liga Feminina 2 complétase co AD Cortegada – BAXI Ferrol. As de Vilagarcía recibirán en Fontecarmoa ás líderes da categoría, o sábado, 9 de xaneiro, ás 19:30 horas.
Este será o estreo do Cortegada en casa neste 2021, ante un rival de altura como son as ferrolás, que non perderon un só partido esta tempada, e non teñen rival que as baixe da primeira posición, onde reinan con 28 puntos e máis de 1.200 tantos ao seu favor.
A realidade das locais é diferente. Con só tres vitorias, son cuartas pola cola e chegan a este difícil partido tras dúas derrotas seguidas, contra a ADBA e o Osés Construcción Ardoi. Con todo, a súa última vitoria foi en casa, polo que Fontecarmoa podería actuar como talismán no xogo das de Vilagarcía.
Pero o reto non será nada fácil. O BAXI Ferrol chega de asinar unha vitoria de máis de vinte puntos ao CB Arxil e doutra por máis de 40 ao Ulla Oil Rosalía. Para este partido seguen lamentando a baixa de Jenna Allen pola súa lesión e é dúbida Irene Gari, xa que sufriu unha gastroenteritis. Xogue quen xogue na pista, as ferrolás son o conxunto máis forte da LF2 e non fallan ni como visitantes nin como locais.
Novo adestrador no Cortegada respecto á 1ª volta
Así foi a súa última vitoria ante o Cortegada, no partido de ida disputado en A Malata. Naquela segunda xornada competitiva, as universitarias lograron un triunfo abultadísimo contra as visitantes. Triplicando os seus puntos anotados, o equipo entón dirixido por Rubén Domínguez non tivo opcións de frear ás de Lino López.
Agora, un novo adestrador ocupa o banco das de Vilagarcía. Javier Nogueira estreouse con vitoria ante o Magec Tías na 12ª xornada, pero desde entón sumou tres derrotas máis.
En palabras do técnico ferrolán, o Cortegada “é un equipo que mudou de adestrador pero que non variou moito na súa forma de xogar. Cortaron a unha das súas estranxeiras e iso dálles máis minutos a outras xogadoras. Creo que ninguén agardaba a principio de tempada que estiveran tan abaixo na clasificación”.
Todo parece indicar que as ferrolás levaranse tamén este partido, aínda que o equipo local quere seguir acumulando boas sensacións que levanten ánimos para volver á senda da vitoria.
