A pasada fin de semana a AD Cortegada viaxaba cos deberes feitos ata as Canarias para xogar contra un Magec Tías Contra a Violencia de Xénero pendente de salvarse na categoría. Unha derrota das galegas por un 82-58 da a salvación ás locais, que estarán coas de Vilagarcía unha tempada máis na Liga Feminina 2.
A distinta ambición coa que chegaban os dous equipos a este duelo deixouse ver na pista de Tías. O Magec xogábase moito, mentres que o Cortegada, que non descenderá tras vencer ao Celta Zorka Recalvi, compite coa tranquilidade de quen se sabe salvado.
Comezo irregular do Cortegada
O conxunto canario, liderado por Camille Giardina e Carolina Mateo, saltou á súa cancha mentalizado en aproveitar cada ocasión que o levara á vitoria. Por iso, executaban con eficacia cada ofensiva, adiantándose no marcador a costa dun Cortegada bloqueado.
A actuación de xogadoras locais como Maiomuna Haidara e Esperanza Delgado ou Sara Duarte facían que á fin do primeiro cuarto o Magec gañase por un 20-10 ás galegas.
Para o segundo tempo, o cadro de Nogueira reaccionou dándolle a volta ao marcador. O conxunto galego pechou a súa defensa debilitando o acerto anotador rival, á vez que era capaz de achegarse cada vez máis á canastra contraria. Porén, os esforzos do Cortegada non foron suficientes para o empate, chegando ao descanso cun 36-30.
Dominio local na segunda metade
O marcador estaba aberto, con toda a segunda metade do partido por disputar, polo que o Magec Tías non se deixou ameazar polas de Vilagarcía e tomou o control do partido.
Os primeiros minutos tras a reanudación estiveron marcados pola igualdade e un Cortegada que mantiña a un tiro de pedra ás canarias, polo que o seu adestrador, Leocadio Pérez, viuse obrigado a parar o cronómetro.
Tras recibir as súas indicacións, as xogadoras locais volveron á pista concentradas, contrarrestando as fortalezas galegas. Así, mantivéronse á cabeza aumentando cada vez máis a renda fronte ás de Nogueira, que vían escapar a vitoria. Cun xogo coral, o Magec Tías situábase a case 20 puntos, con todo o último cuarto por celebrar (62-43).
Todo parecía decidido no último tempo, pero o Cortegada seguiu presionando. Cando o electrónico xa poñía ás visitantes a 27 por debaixo, o adestrador galego solicitou un tempo morto para intentar loitar polo partido.
Pero os esforzos das de Vilagarcía non foron suficientes e as xogadoras víronse sobrepasadas pola compatriota Regina Gómez, quen por un par de faltas persoais non saiu ata o tramo final do encontro.
Finalmente, pouco puideron facer no Cortegada para evitar que o Magec Tías consolidase a vitoria, como finalmente foi (82-54), e con ela a súa permanencia na LF2.
En liñas xerais, o nivel demostrado polas galegas na pista canaria foi inferior ao das locais. Nas filas do Magec destacaron nomes como Haidara e Giardina, MVP e segunda mellor xogadora do encontro con 32 e 31 créditos respectivamente, mentres que no Cortegada a mellor xogadora foi Sedlakova (11 puntos).
Independentemente deste resultado, os plans futuros no club galego seguen a ser os mesmos. Coa salvación conseguida, o Cortegada despedirá a tempada en casa e o fará ante o colista xa descendido, a ADBA, que porén intentará rematar o curso cunha vitoria.
FICHA TÉCNICA
82) MAGEC TÍAS CONTRA LA VIOLENCIA DE GÉNERO: Regina Gómez (2), Maimouna Haidara (17), Carolina Mateo (13), Esperanza Delgado (10), Camille Giardina (1) – quinteto inicial -. Tamén xogaron: Sara Duarte (4), Carla Medina (-), Iranzu Drake (2), Samira Olano (2), Natalia García (5), Mikela Riolo (1) e Esther Milandu (2).
58) AD CORTEGADA: Patricia Vicente (6), Sara Gómez (15), Cristina Loureiro (5), Tereza Sedlakova (8), Lorena Castro (2) – quinteto inicial -. Tamén xogaron: Zeltia Presas (8), Miriam García (2), María González (-), Irene Montenegro (3), Ayitso Wanyama (9).
PARCIAIS: 20-10, 16-20, 26-13 e 20-15.
ÁRBITROS: Rodríguez Francisco e Castro Pulido.
INCIDENCIAS: Partido correspondiente á 25ª xornada do Grupo A da Liga Femenina 2 disputado no pavillón municipal de Tías.
