- Máis de 1.800 corredores descargáronse a app da San Silvestre Coruña, que estará dispoñible até o próximo seis de xaneiro.
- A organización realizou xa os sorteos de máis 60 agasallos de colaboradores e patrocinadores para os máis solidarios, aqueles que realizan unha achega á Cocina Económica.
- Hai descargas de Alemaña, Francia, Italia, Venezuela, Ecuador e, sobre todo, Estados Unidos.
A undécima edición da San Silvestre Coruña, que este ano tivo que adaptarse ás circunstancias sanitarias de 2020 para transformarse nunha carreira virtual e solidaria. Pese a esta modificación por mor da pandemia de COVID-19, a cita está a ser todo un éxito tras alcanzar a cifra de 1.800 participantes a través da app. Ademais, a carreira logrou bater a súa marca de participación de mulleres, co 36% das inscricións (650 dos 1.800 inscritos). O ano pasado esta porcentaxe era do 35% e, aínda que aínda é baixo, vaise incrementando ano tras ano a participación feminina.
De todos os percorridos propostos, o preferido é o de 10 quilómetros que une Riazor con O Parrote, ao que se apuntaron xa 325 persoas, seguido pola outra opción proposta, tamén de 10 quilómetros, desde O Parrote até o Milenium, con case 250 inscritos.
A carreira quere potenciar o seu compromiso coa diversidade funcional, de forma que, aínda que non poida ser de maneira presencial, incluíu unha opción denominada Diversa Inclusiva, na que xa se anotaron 23 persoas.
A pesar de que a carreira este ano é virtual, entre os participantes máis solidarios, que son quen realizaron unha doazón á Cocina Económica, hai máis de 60 sorteos de premios grazas aos colaboradores e patrocinadores, que comezaron xa, aínda que aínda faltan premios gordos por sortear. Hai xamóns do Piñeiral, reloxos deportivos de Xoiaría Calvo, lentes de sol de Óptica Castro, bonos de saúde de Termaria, packs de Coca Cola e Gadis e dorsais para as carreiras da Muller e San Silvestre de 2021.
A aplicación San Silvestre Coruna, aberta até o 6/1/21
A inscrición para realizar os percorridos, así como a descarga da app, estará aberta até o seis de xaneiro. Aínda que a proba é gratuíta, os participantes que así o desexen poderán realizar unha doazón mínima de cinco euros, que irán destinados á Cocina Económica, o que lles permitirá optar aos agasallos e promocións dos colaboradores e patrocinadores.
A carreira realizarase despois de inscribirse a través da aplicación oficial, San Silvestre Coruña, que se pode descargar para dispositivos Android e Apple, ou na páxina web www.sansilvestrecoruna.com. Os participantes poderán realizar un, varios ou todos os percorridos deseñados pola organización ou nun libre, elixido polo propio corredor, todas as veces que queiran aínda que só contabilizará o mellor tempo conseguido.
Desta forma, a San Silvestre Coruña pódese disputar por calquera persoa, de calquera idade en calquera parte do mundo. De feito, aínda que ás descargas son a maioría da Coruña, hai participantes de Alemaña, Francia, Italia, Venezuela, Ecuador e, sobre todo, Estados Unidos. Dentro do territorio español, hai participantes de Asturias, Baleares, Cataluña, País Vasco, Castela e León e Madrid.
Unha muller de 75 anos e dúas nenas de 6
Entre as persoas inscritas na San Silvestre Coruña hai unha gran diversidade, empezando pola idade. Hai anotadas catro persoas de 75 anos, unha muller e tres homes, mentres que no extremo oposto hai dous nenos e dúas nenas de só seis anos de idade.
Hai tres tipos de percorridos, ademais do que elixe libremente o participante: os oficiais (dúas distancias para escolares de 500 e 1.000 metros, 5 quilómetros e 10 quilómetros polo Paseo Marítimo), o Camiño Inglés (cun total de seis etapas) e o Reto Diversa Inclusiva.
A XI San Silvestre está organizada por Club Rialto, coa colaboración do Concello da Coruña e con Abanca, Castro Ópticos e Gadis como patrocinadores. Ademais, tamén colaboran Cocacola, Termaria, Etnia Barcelona, Jamonerías O Piñeiral, Transdelfer, Decathlon, La Opinión A Coruña, Radio Coruña e Fibex.