Cada 8M a sociedade sae á rúa para conmemorar o Día da Muller a o tempo que se pregunta se, finalmente, fomos quen de alcanzar a igualdade real e plena. Avanzamos, evolucionamos, damos pasos, e a meta segue sen cruzarse. Pero, que pasa no deporte galego? En As Nosas decidimos conversar con diferentes mulleres que desenvolven distintos roles deportivos en Galicia sobre igualdade para poder coñecer de primeira man como é a situación actual na súa opinión. Cada unha delas aporta unha visión persoal e diferente, pero a conclusión xeral que tiramos é que o papel da muller no deporte aínda non é igualitario pese a terse avanzado moito. As protagonistas que traemos neste 8 de marzo a no noso xornal deportivo son Miriam Ríos, capitá e futbolista do Dépor Abanca, Helen Roca, ex xogadora internacional de rugby e adestradora do CRAT Residencia Rialta, Sarai Samartín, xogadora do Conservas Orbe Balonmán Porriño, Vero Boquete, que está considerada a futbolista galega máis internacional e agora milita no Utah Royals FC en Estados Unidos , Paula Medín, xogadora de internacional de rugby que milita no CRAT Residencia Rialta, Susú Cores, a primeira adestradora que dirixiu un equipo masculino en Rexional Preferente, ata hai pouco seleccionadora galega Sub 15 e arestora adestradora do Independiente del Valle, na liga de fútbol profesional de Ecuador, e por último Bea Sánchez, capitá do equipo de baloncesto Durán Maquinaria Ensino. O deporte está considerado unha gran ferramenta útil para empoderar ás mulleres e facernos tomar consciencia de todo o que somos capaces, de todo o que aportamos á sociedade. Pero é precisamente a practica deportiva unha das áreas nas que a desigualdade pódese testar rapidamente observando condicións laborais das deportistas profesionais, ou a tan reivindicada visibilidade nos medios de comunicación. Ábrense camiños, tíranse teitos de cristal, mellórase paso a paso, ano a ano pero aínda non se pode falar dunha igualdade real entre deporte masculino e feminino.
