Oito clubs da Mariña lucense solicitan a construción de pistas de atletismo

Foz acolleu nestes días unha xuntanza na que oito clubs de atletismo da Mariña lucense asinaron un manifesto no que solicitan a creación dunhas pistas na zona. A Federacion Galega de Atletismo apoia a creación desa infraestrutura. Polo de agora, o Concello de Foz semella a ubicación que maiores posibilidades tería de albergar este recinto deportivo.

Os clubs que se teñen reunido para este fin pretencen a sete localidades desta zona lucense, o que da conta do arraigo das disciplinas atléticas na Mariña. Trátase do Club Atletismo Ría de Foz, Club Atletismo Burela, Club Atletismo Lourenzá, Sociedade Deportiva Albións da Pontenova, Club Atletismo Ribadeo, Toxiza Clube de Montaña de Mondoñedo, Club Deportivo Egovarros de Viveiro e Peña Lar de Viveiro. 

Os clubs alegan no seu manifesto que: “As e os atletas mariñaos teñen que realizar viaxes de ida e volta dunha media de 2h30 de duración, como mínimo, para poder seguir os seus programas de adestramento por carecer dunhas pistas de atletismo”

Cinco dos oito clubs que se reuniron con este fin están integrados na Federación Galega de Atletismo. Segundo informa o organismo federativo as entidades mariñanas terían acordado asinar un manifesto no que se pide a construción dunhas pistas de Atletismo na Mariña, facendo extensiva a proposta ao Concello de Foz, como posible ubicación, á Deputación de Lugo, á Xunta de Galicia e á propia Federación Galega de Atletismo.

Sobre a posible ubicación das pistas, os oito clubs asinantes consideran: “que o concello de Foz, como centro neurálxico da comarca da Mariña, cumpre os requisitos para ser a ubicación lóxica e racional destas futuras pistas de atletismo. Máis aínda cando se dispón dun estudo profesional que acredita na viabilidade do proxecto nesta vila”.

O vicepresidente da Federación Galega de Atletismo, Suso Vázquez manifestou que “O Atletismo na Mariña está medrando dunha maneira importante grazas ao gran traballo dos diferentes clubes que medran día a día,  e onde de feito, se está barallando a posibilidade da creación de tres novas entidades, o que pon de manifesto a potencialidade da comarca”.

Suso Vázquez explicaba que trasladou aos clubs que solicitan esta nova instalación deportiva para a práctica do atletismo que a Federación Galega ponse “a súa disposición para celebrar o antes posible unha xuntanza e ver as posibilidades de avance co apoio das diferentes institucións sempre en prol da unidade dos clubes da Mariña”.

O vicepresidente da FGA, Suso Vázquez salienta: “O Atletismo na Mariña está medrando dunha maneira importante grazas ao gran traballo dos diferentes clubes que medran día a día,  e onde de feito, se está barallando a posibilidade da creación de tres novas entidades, o que pon de manifesto a potencialidade da comarca”.

En relación ás posibilidades de colaboración das diferentes institucións, o vicepresidente da FGA, Suso Vázquez, salientou que “é o momento que abordemos entre todos un plantexamento conxunto, mirando un proxecto en clave comarcal, aínda entendendo as necesidades e as demanadas de carácter local de cada Concello. Con nós, en diferentes momentos falaron varios concellos, tanto responsables dos equipos de goberno, como voceiros na oposición, para coñecer a situación e respectamos como non pode ser doutro xeito, cada unha das opinións e opcións. O que si que temos claro é que debemos camiñar cara a unhas pistas homologadas que poidan acoller diferentes eventos de ámbito autonómico e nacional con todo o que conlevaría a nivel positivo para A Mariña “, concluiu.

Este é o documento que asinaron os oito clubs da Mariña de Lugo baixo o título:

“A Mariña unida por unhas pistas de atletismo”

O título deste manifesto recolle dúas premisas ben certas: A comarca da Mariña precisa, de xeito prioritario, dunhas pistas de atletismo e esta necesidade fai que diferentes entidades deportivas, vinculadas ao mundo do atletismo e as súas diferentes modalidades, unan os seus camiños para facer posible esta demanda.

As entidades deportivas, e representantes do mundo do atletismo, abaixo asinantes diríxense ás entidades públicas correspondentes (Concello de Foz, Deputación Provincial de Lugo, Xunta de Galicia e Federación Galega de Atletismo) para trasladarlles o seguinte argumentario, moi meditado e razonado, que sustenta a súa solicitude:

• O atletismo é un deporte que conta, en todas as súas modalidades, cada vez cun maior número de seguidores, cunha base sólida e consolidada na nosa comarca de clubs e atletas. Proba disto son a creación dun maior número de clubs, o aumento exponencial da cifra de licenzas deportivas (tanto a nivel de categorías inferiores como absolutas) e o alto número de eventos deportivos relacionados con esta práctica.
• O feito de carecer dunhas pistas de atletismo de referencia na comarca dificulta que os atletas poidan competir en igualdade de condicións cos que si teñen a posibilidade de adestrar nunhas. Mérito engadido ao traballo que xa se está a facer.
• Os atletas mariñaos teñen que realizar viaxes de ida e volta dunha media de 2h30 de duración, como mínimo, para poder seguir os seus programas de adestramento por carecer dunhas pistas de atletismo.
• A creación dunhas pistas de atletismo na nosa comarca, ademais de potenciar a parcela deportiva, contribuiría a estimular a vida económica da nosa comarca (hostelería, hospedaxe, restauración, etc.), posto que abriría a posibilidade de acoller a organización de diferentes probas de carácter comarcal, autonómico ou estatal nestas instalacións.
• Axudaría, ademais, de maneira fundamental ao traballo coa base. A comarca da Mariña converteríase, así, nun viveiro de atletas que puidesen ter unha longa e, por que non soñar, exitosa vida deportiva. Por non sinalar o impacto positivo que tería na vida escolar dos centros educativos da comarca.
• Deste xeito, consideramos que o concello de Foz, como centro neurálxico da comarca da Mariña, cumpre os requisitos para ser a ubicación lóxica e racional destas futuras pistas de atletismo. Máis aínda cando se dispón dun estudo profesional que acredita na viabilidade do proxecto nesta vila.

Finalmente, instamos a todas as administracións públicas implicadas en facer realidade este proxecto (Concello de Foz, Deputación de Lugo, Xunta de Galicia e Federación Galega de Atletismo) a que traballen, dun xeito real e decidido, para facer posible a creación dunhas pistas de atletismo na comarca da Mariña.