- O libro sobre os 75 anos do trofeo , ademais de explicar a historia da cita deportiva, conta cun amplo álbum fotográfico e artigos de homes e mulleres vencellados á tradicional cita de verán.
- “Máis que un torneo de verán, o Teresa Herrera é toda unha institución, unha tradición coruñesa e unha cita obrigada para os fieis seguidores do Deportivo e para os miles de afeccionados ao fútbol de toda a provincia”, afirmou González Formoso, presidente da Deputación da Coruña.
A sede da Deputación da Coruña acolleu a presentación do libro ’75 aniversario Teresa Herrera de Fútbol’, unha publicación editada pola Deputación e o Concello da Coruña que repasa en 358 páxinas e centos de fotografías a historia do veterano torneo coruñés.
No acto estiveron presentes o presidente da Deputación da Coruña, Valentín González Formoso, a alcaldesa da Coruña, Inés Rey García, o presidente do Real Club Deportivo da Coruña, Fernando Vidal, o vicepresidente provincial, Xosé Regueira, o concelleiro de Turismo da Coruña, Juan Ignacio Borrego, e a concelleira de Deportes da Coruña, Mónica Martínez,
O libro fai un percorrido por todas as edicións do torneo a través de datos de cada unha das finais, con aliñacións, resultado dos partidos, goleadores e fotos do torneo masculino, ademais da do feminino a partir da edición número 68 (ano 2013), cun apartado de fotos que reflicte momentos inesquecibles do trofeo.
O libro conta con artigos futbolistas, xornalistas e investigadoras
Ademais, a obra tamén inclúe artigos nos que se contan vivencias de persoas vencelladas ao Teresa Herrera, como o de Emilio Quesada, exconcelleiro e membro da organización dalgunhas das edicións dos anos setenta; Cristina López Villar, profesora da Facultade de Ciencias do Deporte e da Educación Física da Universidade da Coruña; Nacho Carretero, xornalista e escritor; Lis Franco, Moncho Viñas, Manuel González e Antón Luaces, xornalistas; Inma Castañón, exxogadora do clube coruñés Karbo; Miriam Ríos, xogadora en activo; Joaquín Pedrido, xornalista e Xosé A. Touriñán, actor, entre outros.
O libro conta tamén cun apartado para o estadio de Riazor, que cumpre tamén 75 anos, a través dun álbum fotográfico que aporta imaxes inéditas da súa construción e outras que permiten apreciar a evolución experimentada co paso do tempo polo fogar do fútbol coruñés.
Valentín González Formoso destacou que “máis que un torneo de verán, o Teresa Herrera é toda unha institución, unha tradición coruñesa e unha cita obrigada para os fieis seguidores do RC Deportivo e para os miles de afeccionados ao fútbol de toda a provincia”, afirmou.
“O Dépor é un motivo de orgullo para a provincia da Coruña e parte da súa historia vén plasmada neste libro a través de artigos de numerosos colaboradores e de imaxes que repasan os 75 anos do Teresa Herrera”, apuntou o presidente provincial, que agradeceu a colaboración dos articulistas e fotógrafos que colaboraron na publicación.
Pola súa banda, a alcaldesa Inés Rey sostivo que o Teresa Herrera ten sido “un mundial de clubes oficioso” no que participaron algúns dos mellores fútbolistas e equipos do mundo, algúns deles coruñeses coma Luis Suárez ou Amancio. A alcaldesa destacou tamén a dimensión “de celebración colectiva e familiar” que ten o torneo, atraendo xente de Bergantiños, Costa da Morte, As Mariñas e moitos outros puntos da provincia para gozar dunha tarde de fútbol.
A rexedora sinalou que “este magnífico libro reflicte a grandeza do trofeo, da nosa Torre de Hércules e do deporte da nosa cidade” e deulles os parabéns a todas as persoas que participaron na súa elaboración.
Inés Rey, alcaldesa da Coruña: “Este magnífico libro reflicte a grandeza do trofeo, da nosa Torre de Hércules e do deporte da nosa cidade”
Un libro, dixo, que recolle 75 anos fecundos, “de deporte e de cidade, tamén de Concello, de implicación municipal, de capacidade para ir da man do Deportivo, un dos nosos grandes emblemas de cidade, antes e, máis que nunca, agora”. Por iso, lembrou que o domingo temos unha cita en Riazor co fútbol coruñés na súa máxima expresión e tamén coa solidariedade; “temos unha cita todo o ano co que significa o Teresa Herrera, un valor que non só nos negamos a perder, senón que máis ben queremos exaltar como merece”, apuntou.
Pola súa banda, o presidente do RC Deportivo, Fernando Vidal, agradeceu a colaboración institucional que fixo posible este libro, así como a das persoas que narran nel a sua particular visión do toreno, que este ano recuperará a súa orixe benéfica e será “un homenaxe ao fútbol modesto” debido ás restriccións ocasionadas pola pandemia.
O trofeo leva o nome da benefactora coruñesa Teresa Herrera
O trofeo Teresa Herrera naceu como resposta ás necesidades sociais que se vivían na cidade na posguerra na que estaba inmerso o país. Para paliar as penurias dos cidadáns, a Corporación municipal deu un paso adiante e ideou unha competición futbolística que poría os piares do que hoxe é una cita ineludible, tanto para os coruñeses como para todos os que visitan a cidade na verán.
O nome do trofeo débese a Teresa Herrera, muller devota e entregada aos máis necesitados, que pasou á posteridade sen nin sequera sospeitalo cando loitaba porque se construíra un hospital para tódolos pobres da cidade. Nada en 1712 nunha familia humilde, quedou sen pai con catro anos e tivo que axudar á súa nai no mantemento da familia, o que lle impediu recibir formación académica.
Ao morrer a nai tivo que facerse cargo de dúas irmás o que non lle supuxo problema para dedicar o seu esforzo aos máis desfavorecidos. Aínda que morreu sen ver cumprido o seu sono de abrir un hospital para os pobres, o recoñecemento da súa obra chega ata hoxe, xa que o hospital materno-infantil leva o seu nome, así como unha rúa da cidade e o trofeo de fútbol.
A alcaldesa da Coruña, Inés Rey, sinalou que o Teresa Herrera é un fío esencial da historia da Coruña, da súa proxección internacional, da súa forma de entender a vida” e destacou que o trofeo leva o nome dunha benefactora”, unha persoa que forma parte da estirpe das María Pita, das Emilia Pardo Bazán e das Rosalía de Castro”. A rexedora tamén fixo fincapé na orixe solidaria dun torneo que nesta edición recupera ese espírito de lles axudar a aquelas persoas que máis o precisan.
Rey Indicou que a orixe do Teresa Herrera tampouco se pode entender sen o seu fogar, o estadio de Riazor. “Foi Riazor un dos estadios máis espectaculares de Europa como foi o Teresa Herrera un Mundial de Clubs oficioso”. Para a alcaldesa, en contra de tópicos mal intencionados, “A Coruña é todo o contrario a unha cidade pechada en si mesma. Temos mirada exterior e internacional, sabemos competir no máis alto, por iso o Teresa Herrera acollía os mellores equipos e xogadores existentes”.
A través do Teresa Herrera, A Coruña abriuse ao mundo e o mundo recalou na nosa cidade cada verán destes 75 anos traendo aos mellores equipos coas súas figuras de cada momento. Unha historia que comezou a escribirse un lonxano 30 de xuño de 1946 cando o Sevilla se enfrentou ao Atlhetic de Bilbao, partido que marcou a senda do que hoxe é considerado o mellor trofeo do mundo.
A alcaldesa da cidade herculina non quixo esquecer todo o que o Teresa Herrera nos conta da forma de ser coruñesa, do noso gusto pola socialización e do traballo dos clubs de barrio. “O fútbol como celebración colectiva, iso é o Teresa Herrera, tamén grazas ao traballo e músculo que sempre lle achegaron os nosos clubs de barrio, o querido fútbol modesto”.
Inés Rey, alcaldesa da Coruña, falou do: “Fútbol como celebración colectiva, iso é o Teresa Herrera, tamén grazas ao traballo e músculo que sempre lle achegaron os nosos clubs de barrio, o querido fútbol modesto”
Pola súa banda, o concelleiro de Turismo da Coruña, Juan Ignacio Borrego, agradeceulles o seu traballo a todas e todos os implicados nun proxecto en que que se realiza un percorrido por todas as edicións do torneo e que inclúe artigos de vivencias propias de persoas moi vencellas ao torneo. Tamén tivo palabras de agradecemento para os xornais da cidade que colaboraron prestando parte do seu arquivo gráfico.
Juan Ignacio Borrego, concelleiro de Turismo da Coruña: “O libro recolle tamén os 75 anos do estadio de Riazor”
O libro, explicou Borrego, conta tamén cun apartado para o estadio de Riazor, que cumpre tamén 75 anos, a través dun álbum fotográfico que achega imaxes inéditas da súa construción e outras que permiten apreciar a evolución experimentada co paso do tempo polo fogar do fútbol coruñés.
O Teresa Herrera de fútbol habilita unha Fila 0 para sumar achegas benéficas
