Ata sete xogadoras din adeus esta tempada á disciplina do Pescados Rubén Burela. Ale de Paz, Lara Balseiro, Bea Mateos, Sandra Buzón, Elena Aragón, Elenita e Leti M. Cortés deixan de ser Guerreiras Laranxas no curso 2022-23.
Desde a súa chegada no verán de 2019, Ale de Paz viviu algúns dos momentos máis importantes do club da Mariña. A futbolista galega demostrou unha calidade de xogo impecable. Xogando na posición de á co número 17, Ale de Paz brillou na pista, tanto xogando co Pescados Rubén Burela FS como en cada un dos partidos nos que lucía a camiseta da Selección Española de Futbol Sala feminino coa que acaba de gañar o Europeo ás ordes de Clàudia Pons. Ale de Paz anotaba dous dos tres goles españois no partido final ante Portugal.
Durante estes últimos anos, Ale de Paz estivo presente nalgúns dos momentos máis importantes para o club lucense. Desde a súa chegada, contribuíu á obtención de múltiples éxitos, con 2 Supercopas de España, 2 Copas S.M. A Raíña, 2 Campionatos de Liga da RFEF, 1 Copa Xunta de Galicia e a vitoria da Futsal WEC, a Champions de fútbol sala que converteu ao club no campión de Europa.
Ademais disto, Ale de Paz formou parte do equipo que dous anos consecutivos nos que o club foi nomeado o Mellor Club Feminino do Mundo nos premios Futsal Awards.
Lara Balseiro, fin a unha etapa de 13 anos no Pescados Rubén Burela
No caso de Lara Balseiro falamos de nada menos que 13 sendo unha Guerreira Laranxa. Tal e como explicaban desde o Pescados Rubén Burela, “Lara creceu co clube, celebrando cada éxito e marcando historia coas Guerreiras Laranxas. A xogadora co número 10 ás costas mostrou unha gran calidade de xogo e deunos bos momentos. Xunto a ela vivimos todo tipo de vitorias en supercopas, ligas e mesmo na Futsal WEC, momento no que o club se fixo co título de campión de Europa”.
Como no caso de Ale de Paz, Lara Balseiro estivo nese bloque de futbolistas que foi nomeado Mellor Club Feminino do mundo nos Premios Futsal Awards. Ao longo destes anos no club da Mariña, Lara Balseiro sumou co clube máis de 20 títulos.
Este fin de curso é tamén tempo de despedidas na portaría. Chegou o momento do adeus a Sandra Buzón, xogadora que, desde que se uniu ao bloque do Pescados Rubén Burela FS, defendeu con éxito a portería do equipo.
Tras o seu paso polo Leganés FSF, Sandra uníase a plantilla do Pescados Rubén Burela na tempada 2020-21. Ao longo destas dúas últimas tempadas, a porteira co número 4 ás costas estivo presente nalgúns dos momentos máis importantes para o club como foron as 2 Supercopas de España, as 2 Copas de S.M. A Raíña, 1 Campionato de Liga da RFEF, 1 Copa Xunta de Galicia ou mesmo a vitoria do equipo na Futsal WEC, a Champions que convertía ao Pescados Rubén Burela FS en campión a nivel europeo.
Bea Mateos atesora nove anos como futbolista no equipo da Mariña. co número 14 ás súas costas, chegou a lucir o brazalete de capitá das Guerreiras Laranxas. Sobre a pista de Vista Alegre, demostrou contar cunha calidade de xogo única. Cunha visión de xogo que a fixo brillar como capitá, a xogadora no posto de á-peche estivo presente en 18 títulos do club, entre os que destacan a vitoria do Pescados Rubén Burela FS na Futsal WEC, a Champions de fútbol sala que fixo que o club se convertese no campión de Europa, así como ligas, copas e supercopas.
Tamén é tempo de despedidas para Elenita, quen se uniu ás filas de Pescados Rubén Burela FS a pasada tempada con gran ilusión e disposta a afrontar grandes retos. Tras o seu paso pola UA, Elenita uníase ao Pescados Rubén Burela con intención seguir crecendo e evolucionando na súa carreira profesional.
Leticia Cortés, fútbol e deseño
Hai dous anos que chegaba ao conxunto lucense Leticia Martín Cortés, unha futbolista que deu un rendemento altísimo na pista. Durante estas campañas no Pescados Rubén Burela, Leti Cortés entregouse por completo no seu posto como á-peche, dando moito xogo en equipo e apoiando nos momentos máis duros. Este traballo constante traduciuse en grandes éxitos, sendo partícipe de lograr case todos os títulos que se podían disputar, entre elas as 2 Supercopas de España, as 2 Copas de S.M. A Raíña ou a vitoria do equipo na Futsal WEC onde as Guerreiras Laranxas fixéronse co título de campioas a nivel europeo.
Ademais de mostrar o seu talento na pista, Leti Cortés deu o mellor de si mesma deseñando algunhas das camisetas para o club. Importantes mensaxes de apoio, deseños fascinantes e, por suposto, a esencia do equipo.
Finaliza tamén etapa Elena Aragón, unha xogadora que desde que chegou ao Pescados Rubén Burela ofreceu moito traballo e éxito.
