O Pescados Rubén Burela FS conquistou en Noia a súa sétima Copa Galicia de fútbol sala tras vencer, nunha enorme final, ao ENCE Marín Futsal por un marcador de 1-5. O partido disputouse no pavillón Agustín Mourís de Noia.
Os tantos de Antía Pérez, Dany, Peque e máis Emilly outorgaron ao combinado que dirixe Julio Delgado o terceiro título da tempada ante un ENCE Marín Futsal que nunca baixou os brazos na súa primeira cita finalista.
A primeira parte cumpriu coas expectativas. Ambos saíron con todo a por a Copa Galicia e o ritmo foi eléctrico e por momentos a final deste ano 2023 converteuse nun auténtico correrrúas.
O ENCE Marín Futsal, a pesar de ser a súa primeira comparecencia nunha final, saíu sen medo. Con todo, o Pescados Rubén Burela FS desequilibrou a balanza na súa primeira chegada á meta defendida por Silvia Aguete. Antía Pérez recolleu unha pelota fóra da área e superou á gardameta do ENCE Marín Futsal cun disparo raso. Corría por aquel entón o minuto 8 de xogo.
O tanto non amedrentou ao elenco preparado por Ramiro Díaz, que se foi a por o empate e tívoo nas botas de Ale de Paz, pero o seu zapatazo estrelouse contra a madeira da meta defendida por Caridad.
A oda ao fútbol sala continuou nos últimos 10 minutos. Ale de Paz volveu ter o 1-1, pero de novo emerxeu a figura de Caridad. Na outra área, Peque puido anotar o 0-2, pero o seu disparo marchouse fóra. Non había tempo nin para un respiro.
Antes do descanso, o ENCE Marín Futsal voltou avisar cunha xogada de tiraliñas desde a súa propia área, pero o disparo de Café marchou lambendo o poste dereito do equipo laranxa.
Ao descanso o Burela vencía pola mínima esta Copa Galicia 2023
Co 0-1 chegouse ao intermedio no Pavillón Agustín Mourís de Noia. E logo do paso por vestiarios, o Pescados Rubén Burela FS sentenciou a gran final facendo gala da súa pegada. Dany puxo terra de por medio no primeiro minuto da segunda metade nunha rápida transición. Malia ao golpe, as futbolistas que adestra Ramiro Díaz non tiraron a toalla e Ale de Paz, á saída dun córner, metería as súas na finalísima ao rematar libre de marca.
Co 1-2 comezou un novo partido onde o Pescados Rubén Burela FS castigou ás marinenses. Peque, tras un erro na saída do ENCE Marín Futsal, volvería poñer terra de por medio ao anotar o 1-3.
Xa na recta final, e co ENCE Marín Futsal envorcado, Emilly sentenciaría o encontro anotando o 1-4 e Patricia sumouse á festa marcando o 1-5 definitivo para desatar o delirio entre a parroquia da Mariña desprazada ata Noia para gozar desta gran final da Copa Galicia de fútbol sala.
FICHA TÉCNICA
1) ENCE MARÍN FUTSAL: Silvia Aguete, Adri, Ale de Paz, Pau e Café (cinco inicial). Tamén xogaron Mery, María León, Lucía Paz, María, Lara Balseiro, Inés e Nuria.
5) PESCADOS RUBÉN BURELA FS: Caridad, Dany, Peque, Antía Pérez e Irene Samper (cinco inicial). Tamén xogaron Saki, Cilene, Claudia, Jenny, Ester, Patricia e Emilly.
GOLES: 0-1 | Antia Pérez, min. 8. 0-2 | Dany, min. 22. 1-2 | Ale de Paz, min. 25. 1-3 | Peque, min. 30. 1-4 | Emilly, min. 35. 1-5 | Patricia, min. 39.
EQUIPO ARBITRAL: Dacal Deza e Pinilla Boullosa.
INCIDENCIAS: Final Feminina da Copa Galicia de fútbol sala 2023 organizada pola Real Federación Galega de Fútbol (RFGF). O partido disputouse no Pavillón Agustín Mourís do Concello de Noia.
