Este domingo, 23 de maio, celébrase en Valladolid o Campionato de España de Dúatlon de remudas mixtas. Nel participarán sete clubs galegos, en busca dunha boa puntuación para a Liga Nacional Talento.
O Cidade de Lugo Fluvial, o Triatlon Inforhouse Santiago, o AD Náutico de Narón, o Triatlon Ferrol, o AD Fogar, o Club Triatlon Compostela e o AD TRI-PENTA Terras de Lugo serán os representantes de Galicia en Valladolid.
Así será a proba de remudas mixtas
Nesta competición de remudas mixtas, catro deportistas de cada club, dúas mulleres e dous homes, competirán nun dúatlon de distancia SuperSprint. Cada atleta deberá cubrir 2 quilómetros na primeira carreira a pé, 5 quilómetros no segmento ciclista e un de carreira a pé final.
A competición comezará ás 10:00 horas, e á fin das últimas probas da mañá celebrarase o acto de entrega dos premios, seguindo un estricto control de seguridade sanitaria.
Tras a primeira proba, celebrada en Alcobendas, a clasificación da Primeira División sitúa á AD Náutico de Narón en segunda posición, o Triatlon Ferrol como cuarto, o Triatlon Inforhouse Santiago como sexto e o Cidade de Lugo Fluvial en sétima praza. Na Segunda División, a AD Fogar sitúase como oitavo clasificado.
