A Primeira Fase da Liga Nacional de cadete, sénior e para-karate celebrarase esta fin de semana, do 16 e 17 de xaneiro, no pavillón municipal Central Pitiu Rochel en Alacante. Alí participarán ata nove karatekas representando a Galicia coa Federación, seis delas mulleres.
A Liga Nacional Iberdrola, correspondente á competición feminina, disputarase o domingo 17 desde as 08:30 da mañá. Ese día competirán en cadete a karateka Lena Álvarez, do River Stone, en categoría kata e Valeria Montero, do Bunkai, en kumite -54kg.
Na sénior, tres deportistas competirán por Galicia na categoría kumite. Trátase de Ruth Lorenzo, do San Francisco Teo, que o fará en -55 kg; Lucía Herrero, do River Stone, compartindo categoría -55 kg e Lucía Guerrero, do Renbu Kan, en -68 kg.
Por último, tamén participará a karateka Cristy Shedimar Tojo, do Ávalon Kai, que o fai en kata discapacidade visual. A expedición feminina galega complétase coa participación dunha árbitra: Carla Rodríguez Fernández.
Ademais, tamén viaxarán Xavier Santos, Nicolás Pinaque e Alejandro Felpeto para competir no torneo masculino e Diego González, Enrique José Blanco e David González en calidade de árbitros.
A competición poderá seguirse en LaLigaSportsTV.
