Seis futbolistas representan ao fútbol sala galego coa Selección

A seleccionadora nacional de futsal, Clàudia Pons, fixo xa oficial a lista das 15 xogadoras que se incorporarán á disciplina da Selección Española. Na convocatoria atópanse tres galegas, Silvia Aguete, Ale de Paz e Luci Gómez, ás que se suman en representación do futsal galego Peque, Dany e Caridad.

As actuais campioas de Europa emprenden o camiño para revalidar o título. Un percorrido que ten a súa primeira parada na localidade sueca de Halmstad. Ata alí téñense que desprazar as xogadoras internacionais para disputar a fase de clasificación do próximo Europeo.

A Selección de futsal, exenta na fase anterior, ten que enfrontarse agora a Eslovaquia, Italia e Suecia. UEFA xa fixou a orde dos partidos e quedaron programados da seguinte maneira: o mércores 20 de outubro españolas e eslovacas cruzaranse na pista, a partir das 15:00 horas; ao día seguinte e co mesmo horario, as xogadoras convocadas por Clàudia Pons terán que xogar contra Italia; e xa o sábado 23 chegará o momento de enfrontarse ás anfitrioas desta fase previa. O encontro Suecia-España arrincará ás 17:00 horas.

Este próximo domingo 10 de outubro as 15 xogadoras citadas deberán presentarse ao mediodía no Hotel Pax Torrelodones. O combinado nacional de futsal exercitarase no Pavillón da Cidade do Fútbol de Las Rozas antes de partir rumbo a Suecia, o día 18. A concentración finalizará o domingo 24, tras regresar do país escandinavo.

A convocatoria de Pons