O Concello da Coruña, a través da Concellaría de Deportes, resolve definitivamente a convocatoria de usos das instalacións deportivas municipais. En total, pasarán a adestrar semanalmente nas instalacións deportivas municipais 20.500 deportistas, das cales cerca de 5.000 son mulleres e 14.000 son menores de idade.
A partir da data da resolución, as entidades solicitantes poderán utilizar as instalacións deportivas municipais para realizaren adestramentos, sempre e cando presenten a documentación requirida na convocatoria e cumpran cos protocolos de prevención da COVID-19.
As entidades que fan deporte federado, poden usar as instalacións de balde
O Goberno local coruñés puxo á disposición das entidades deportivas da cidade 52 instalacións de dominio municipal, con máis de 600 franxas horarias ao longo da semana. Canto ás entidades que realizan deporte federado, poderán empregar estas instalacións de xeito gratuíto.
A concelleira de Deportes, Mónica Martínez, asegura que se atenderon “131 solicitudes, das cales 101 corresponden a solicitudes de clubs e federacións para practicar deporte federado” e que as 30 restantes, “son de entidades e clubs non federados e academias de formación que precisan recintos deportivos para as probas de acceso a corpos especiais”.
Mónica Martínez, concelleira de Deportes: “Atendéronse 131 solicitudes, das cales 101 corresponden a solicitudes de clubs e federacións para practicar deporte federado”
O Concello da Coruña, asegura estar realizando un esforzo por dotar de máis instalacións deportivas municipais a cidade, “con grandes proxectos que se iniciarán en 2021, como é unha nova piscina, a ampliación do rocódromo de Riazor ou polideportivos multideporte, entre outras”, apuntou a edila de Deportes. “A convocatoria segue viva, por tanto, as horas que vaian quedando libres ao longo da tempada pódenas solicitar os clubs que así o necesitaren”. Ademais, as horas que non se ofertaron quedan reservadas para uso da Concellaría de Deportes na súa actividade propia e para lle seren alugadas á cidadanía.
As instalacións da Coruña que se poderán alugar e o horario dispoñible publicaranse na web de Deportes para coñecemento xeral.
A concelleira de Deportes, Mónica Martínez, sinalou que “fai catro anos que non se consegue resolver esta convocatoria” e que agora “entrarán a adestrar clubs que o estaban demandando desde hai anos, posto que a distribución dos usos levaba prorrogada dende o ano 2016”.
A resolución da convocatoria de uso das instalacións pódese consultar na web municipal de Deportes
