Este mes a travesía a nado ‘Vila do Tea’ alcanza a súa quinta edición. A proba, que se desenvolve o próximo 14 de agosto no río Tea ao seu paso por Ponteareas, cumprirá o formará parte unha vez máis do 12º Circuíto Galego de Augas Abertas.
O circuíto esta tempada contará con tan só 3 etapas, e finalizará co campionato galego en Castrelo de Miño en setembro. Haberá varias distancias e categorías, ademais dunha proba de substitucións mixtas e, por vez primeira, un circuíto de natación adaptada.
A distancia á que se enfrontarán os nadadores/ as que elixan o maior percorrido serán 3.600 metros que cubrirán en 3 voltas, con saída e chegada na Praia Fluvial da Freixa.
Esta travesía a nado ‘Vila do Tea’ ten 2.000 euros en premios. As categorías en liza serán:
- 10:00 h – 3.600m – Máster / popular
- 11:45 h – 3.600m – Elite
- 12:50 h – 1.200m – Alevín, infantil, popular, adaptada.
- 13:15 h – 200m – Menores e adaptada.
- 13:20 h – 4x400m – Remudas mixtas elite e popular.
Para as inscricións hai que dirixirse á web www.ccnorte.com.
A proba conta con un protocolo de seguridade fronte a COVID-19
No contexto sanitario actual, coa incerteza por organizar eventos, é de destacar a aposta decidida do CN Ponteareas por manter esta travesía a nado, unha competición que toma visos de clásico a pesar da súa mocidade, que máis aló do interese deportivo pon énfase na promoción dun turismo deportivo seguro, sostible e de natureza, aplicando medidas e protocolos de seguridade fronte ao COVID19.
A organización parte co desexo de superar o mellor rexistro de nadadores e nadadoras rexistrados, 174. Este desexo está unido á planificación minuciosa, coidando todoslos detalles para que os nadadores e nadadoras só teñan que preocuparse por gozar desta modalidade deportiva.
A presentación da V edición da travesía a nado ‘Vila do Tea’ tivo lugar no salón de plenos do Concello de Ponteareas, asistiron Miguel Bouzó ( concelleiro de deportes), Cristina Fernández (alcaldesa), Nava Castro (directora xeral de turismo de Galicia), Andrés Carrera (presidente C. N. Ponteareas) e Cristian Fernández (comisión técnica de augas abertas da Federación galega de natación).
Desde o club do condado aproveitaron a presenza da directora xeral de Turismo, Nava Castro, para tomar como exemplo o labor de Turismo de Galicia e exercer tamén como embaixadores do turismo galego no ano Xacobeo 21-22, formando parte da oferta deportiva e cultural de Ponteareas e a súa comarca.
Na Travesía a nado ‘Vila do Tea’ haberá transmisión vía streaming
Ademais será retransmitida en directo por streaming, chegando así ás pantallas de calquera parte do mundo. O CN Ponteareas agradece “sinceramente a implicación das institucións así como de todas as persoas que participan na organización deste evento deportivo desde hai semanas e que fan posible que este tipo de actividades sexan unha realidade”.
