O calendario de cinco eventos da Copa de España de Enduro 2023 baixou o pano o pasado domingo en Galicia, na comunidade autónoma onde se disputaron máis probas e a que máis clasificacións xerais conquistou. Cinco riders galegos coroáronse gañadores do certame estatal na Montefaro Enduro Race, a proba organizada polo Pulpeiros Mugardos na súa localidade e en Ares. Alba Arias (CiclosQuintena) adxudicouse o ranking elite, David Fernández (Avanza-O Porriño) o sub23, Santos Lemos (Grupeta Pan de Zarko) o máster-30, José Manuel López Vaqueiro (Cerdedo-Cotobade) o máster-40 e Marco Veiga (CiclosQuintena) fíxose co elite e tamén co absoluto masculino.
A Montefaro Enduro Race, que exerceu de Campionato de España no 2021, volveu demostrar que é unha das citas de referencia no panorama estatal. Trátase dunha competición que agrada aos participantes polo deseño dos seus treitos, a súa beleza paisaxística e o trato que reciben. Nesta edición da Montefaro Enduro Race o gran traballo realizado polo Pulpeiros Mugardo viuse afectado por un problema externo coa cronometraxe.
O mellor rexistro scratch ao remate do cinco parciais cronometrados da Montefaro Enduro Race asinouno o vixente campión galego elite Mauro González (Salvaterra), mentres que nas mulleres impúxose a sub23 asturiana Cristina Menéndez (Cuetos Bike). No resto de categorías cinco representantes do noso Enduro subiron ao máis alto do podio: Hugo Rosendo (Cerdedo-Cotobade) nos juniors, David Fernández nos sub23, Santos Lemos nos máster-30, José Manuel López Vaqueiro nos máster-40 e José Misa (Raposo) nos máster-50/60.
A Copa de España, que un mes antes fixera parada no Endurrazo, chegou a esta última xornada con seis rankings comandados por riders da ‘armada galega’ e en ningún deles se rexistrou un cambio de líder. A esa media ducia de títulos hai que engadir nove clasificados nos tres primeiros postos das xerais.
Mauro González obtivo a segunda posición elite, Arantxa Gómez (OsdoSacho) a terceira cadete feminina, Yerai Peláez a terceira cadete masculina, Raúl Romero (A Forna) a segunda júnior, Hugo Rosendo a terceira júnior, Hugo Fernández (THC Bike) a segunda máster-40, Jose Ernesto Camesella (Monteboi) a segunda máster-50, Santiago Alonso (Monteboi) a terceira máster-50 e Francisco Javier Acevedo (Bici Verde) a segunda máster-60.
Ratificada a súa condición de potencia estatal, o Enduro da nosa comunidade celebrará o seu Campionato na última fin de semana deste mes en Budiño, no concello pontevedrés do Porriño.
