Cinco medallas para Galicia no Campionato de España de atletismo de 5.000 e 10.000 metros

Galicia foi primeira no medalleiro grazas as cinco medallas obtidas polos atletas da nosa comunidade. Acadáronse en total 5 metais: 1 ouro, 3 pratas e 1 bronce, dos cales 4 foron conseguidos por atletas femininas.

A expedición galega regresou do Campionato de España de 5.000 e 10.000 m. celebrado esta pasada fin de semana en Mahón, cun balance extraordinario ao sumar un total de cinco medallas (un ouro, dúas pratas e dous bronces), ademais dun posto de finalista. Uns resultados que, a nivel estatístico, situaron a Galicia á cabeza do medalleiro xeral da competición, confirmando o excelente momento que atravesa o atletismo de fondo da nosa comunidade.

Ata a localidade balear desprazáronse 15 atletas de Galicia, que protagonizaron unha destacada actuación colectiva nun campionato no que brillaron especialmente as categorías femininas de base. As prestacións máis sobranceiras chegaron nas probas de 5.000 metros Sub-20 e Sub-18 femininas, onde as representantes galegas lograron catro das seis medallas en xogo.

Podio da proba de 5.000 mts do Campionato de España categoría Sub18 feminina, na que foi primeira Sabela Castelo, do Sanysec-Ourense e segunda, Paula Fernández da Sociedad Gimnástica de Pontevedra / RFEA — Representación de Galicia no podio da proba de 5.000 mts do Campionato de España categoría Sub18 feminina, na que foi primeira Sabela Castelo, do Sanysec-Ourense e segunda, Paula Fernández da Sociedad Gimnástica de Pontevedra / RFEA

Na categoría Sub-18, a gran protagonista foi Sabela Castelo do Sanysec-Ourense, quen volveu deixar patente o seu enorme talento cunha actuación impecable. A atleta proclamouse campioa de España dos 5.000 metros tras dominar con autoridade a carreira e cruzar a meta cun tempo de 17:09.37, marca que ademais supón un novo récord do campionato.

O éxito galego nesta proba completouse co brillante segundo posto de Paula Fernández, corredora da Sociedad Gimnástica de Pontevedra, que asinou unha notable marca persoal de 17:37.98, acadando así a medalla de prata e confirmando o dominio galego na categoría ao ocupar as dúas primeiras posicións do podio.

Dúas galegas do At. Pino no poido Sub-20 dos 5.000 m

Tamén nos 5.000 metros, pero xa na categoría Sub-20, as irmás internacionais do Atletismo Pino, Debritu Paniagua e Demeku Paniagua volveron ofrecer unha actuación memorable. Ambas subiron ao podio tras rematar na segunda e terceira posición, respectivamente, con rexistros de 16:30.69 e 16:40.47, sumando así dúas novas medallas para a delegación galega.

Podio da proba de 5.000 metros Sub20 feminina do Campionato de España no que foi segunda a galega Debritu Paniagua e terceira a tamén galega Demeku Paniagua, as dúas do At. Pino / RFEA

Co impulso destas catro medallas femininas, chegou tamén o quinto metal da xornada grazas a outro dos nomes destacados do atletismo galego actual, Xoel Frenco. O corredor do Celta Atletismo acadou a medalla de prata nos 5.000 metros Sub18 masculinos tras completar unha gran carreira, na que parou o cronómetro en 14:51.12.

Ademais das medallas, tamén cómpre salientar a presenza entre os finalistas de Antía Castro, representante do Vicky Foods Athletics, que logrou un meritorio posto de finalista nos 10.000 metros absolutos, así como de Pablo Vázquez, do Atletismo Narón, quen tamén entrou entre os mellores na proba dos 5.000 metros Sub-18.

En conxunto, o campionato deixou unha sobresaliente actuación do atletismo de Galicia, que volveu demostrar o seu enorme potencial nas probas de fondo e medio fondo, especialmente nas categorías de formación, nas que Galicia continúa a consolidarse como unha das principais canteiras do panorama estatal.