O ecuador da primeira fase da Primera Nacional está á volta da esquina, e o fútbol galego domina a táboa clasificatoria do grupo 1. Os primeiros cinco clasificados son conxuntos de distintos puntos de Galicia: PM Friol, Viajes Interrías, Sárdoma CF, Umia CF e Dépor ABANCA B.
Ademais, nesta categoría compiten outros catro equipos galegos, que ocupan da posición oitava á 14ª. O mellor clasificado deles é o Victoria CF, que é oitavo. Xa na zona baixa, a UD Mos ocupa a 12ª posición, mentres que Victoria FC e SD Villestro están na zona de descenso, nos postos 13º e 14º.
O Friol cede un punto ante o Olímpico de León
Na última xornada, o líder da táboa da Primera Nacional, o PM Friol, desprazábase a León para xogar contra o Olímpico, equipo da zona media da clasificación que porén tratou de ti a ti ás galegas.
A presión local pasoulle factura ás lucenses na primeira media hora, na que non lograban crear ocasións de gol fronte a portería leonesa. A insistencia do Friol tivo premio no minuto 39, pouco antes do descanso, cun gol de Alicia Martínez. Antes de que o árbitro anunciara a pausa, o Olímpico de León soubo responder á ofensiva lucenses, cun gol no minuto 42, obra de Alba Gordillo desde o punto de penalti.
Co resultado completamente aberto, a segunda metade deixou un espectáculo digno da igualdade no marcador. O Friol seguía insistindo para adiantarse no electrónico, e conseguiuno no 78, cun golazo de Nerea Rodríguez. Pero como xa pasara na primeira parte, o Olímpico de León respondeu con outro gol aos poucos minutos, desta vez de Claudia Blanco, poñendo o 2-2 final.
Goleada do Interrías ante o Sporting de Gijón B
O Interrías segue en busca de recuperar o liderado que o Friol lle roubou na Primera Nacional. As de Portonovo marchan segundas, a un punto das lucenses, pero cun partido menos disputado, ao ter que aprazar o encontro co Olímpico de León polas malas condicións meteorolóxicas.
Así, na última xornada disputada, as galegas recibían en casa ao Sporting de Gijón B, nun partido que dominaron de principio a fin. O primeiro gol da tarde non se fixo esperar e chegou no minuto 10 da man de Catarina Moreira.
O Interrías daba así un golpe na mesa, deixando claro o seu control do encontro, e controlando ás asturianas desde a defensa. Antes de que chegara o descanso, as galegas anotaron de novo, desta vez con outra Catarina, Da Silva, que marcaría gol no minuto 32.
Co partido case decidido, as de Portonovo afianzarían a súa vitoria no minuto 60, cun terceiro gol, anotado por Andrea Villadeamigo, e deixando ao filial do Sporting sen opcións de remontada. Con estes tres goles, as xogadoras adestradas por Luis Treviño volveron á senda da vitoria, despois de tres semanas sen coñecer o triunfo.
As cebras lévanse o derbi coruñés
Na Coruña, a 12ª xornada traía un derbi coruñés na Primera Nacional, entre o Victoria CF e o Dépor ABANCA B. O partido resolveuse nun emocionante tramo final, coas cebras cambiando a vitoria de bando.
Desde o primeiro momento este derbi perfilouse como un pulso entre dous equipos fortes, que loitaban por sumar tres puntos para seguir escalando postos na táboa clasificatoria. Así, a primeira metade rematou sen gol e sen ocasións claras para ningún dos dous bandos.
Na segunda parte, as deportivistas comezaron a coller ritmo, controlando momentáneamente o partido, pero o primeiro gol sería do Victoria CF no minuto 82, cun tanto de Candela Vázquez. Responderon as branquiazuis cun disparo de Paula Monteagudo no 84, poñendo o 1-1 no electrónico. Porén, as cebras non deixarían escapar a ocasión de vitoria, e volveron anotar no 89, cun gol de Alba Suárez que sentenciaría o partido.
Despois de catro derrotas consecutivas en casa, o Victoria CF volveu a gañar ante a súa afección.
O Umia imponse ao Versalles A
O cuarto clasificado, o Umia CF tamén sumou tres puntos na última xornada. As galegas recibían encasa ao Veralles A, equipo da zona baixa da táboa, que con todo deu guerra ás locais.
Na primeira parte, o duelo mantíñase moi igualado, rematando cun 0-0 no marcador, proba do equilibrio de nivel entre ambos bandos. Para a segunda metade, as galegas golpearon primeiro, cun gol de Eva López no minuto 56.
Pouco despois, no 68, Natalia Sánchez anotaría o segundo tanto para o Umia, que lideraba tranquilamente xa no partido. Con todo, o Versalles non desistiu e anotou o seu primeiro gol no minuto 73. Unha reacción que chegou tarde e que non impediu a traballada, pero merecida vitoria galega.
O Victoria FC pon terra de por medio co SD Villestro
Na zona baixa do grupo 1 da Primera Nacional, dous equipos galegos loitaron por sumar e alonxarse do pozo. O partido entre o Victoria FC e o SD Villestro resultou en vitoria para as de primeiras, que sumaron tres necesarios puntos para seguir soñando coa permanencia na categoría.
Despois de doce xornadas, as xogadoras do Victoria por fin puideron celebrar un triunfo coa súa afección, que valeu dobre, ao ser ante outras santiaguesas. O encontro comezou con moita intensidade entre ambos conxuntos, con ocasións en ambas porterías.
Con todo, o Victoria FC non tardaría en facerse co control, xerando ocasións de perigo que transformarían en gol no minuto 37, cun tanto de Lau a pase de Ánxela nun saque de esquina.
Ver esta publicación en Instagram
Para a segunda parte, as vermellas souberon interpretar o ritmo do partido, mantendo o dominio do balón. Así, manterían ao Villestro a raia, logrando sentenciar o encontro a tres minutos da finalización, cun gol de Marta, de novo tras un saque de esquina de Ánxela.
As xogadoras do conxunto gañador dedicaron o partido á súa compañeira Carla, quen marcha en xaneiro a Estados Unidos para xogar cunha beca deportiva en Alabama. Tamén ao outro lado do charco está outra futbolista galega, procedente dun Victoria, pero coruñés: Laura Cetina.
Laura Cetina: “En Eastern temos que ter un 7 en todas as materias para poder xogar os partidos”
A UD Mos cae ante o Gijón FF
No apartado de derrotas galegas, a UD Mos visitaba na nova xornada de Primera División ao Gijón FF. No encontro, as visitantes golpearon primeiro, pero finalmente a vitoria foi para as asturianas.
O primeiro gol do encontro chegou no minuto 21, obra de Joana Montouto para o UD Mos. Con todo, esta sería a única vantaxe que lograrían as galegas no duelo, que lograrían manter do seu lado ata os minutos finais da primeira parte.
No minuto 43, as asturianas marcaron o seu primeiro tanto a través de Cristina Menéndez, que igualaría o marcador. Na segunda metade, as forzas manteríanse equilibradas entre ambos equipos, ata que a un minuto do pitido final, Libertad Hernández marcaría o gol da vitoria para o Gijón.
O Sárdoma empata ante o Oviedo B
Finalmente, a xornada para as galegas rematou cun empate entre o Sárdoma e o Oviedo B, nun encontro no que as visitantes anotaron primeiro, cun gol de Noelia Pereira.
As asturianas non conseguían atoparse co gol, pero seguiron presionando ata o final, cando no minuto 87 lograrían anotar o tanto do empate. Reparto de puntos na capital asturiana.
