- Varios conxuntos galegos dos repescados que reiniciaron a carreira desde As Pontes tamén cruzaron a meta situada no Paseo do Parrote na Coruña.
- Máis dunha decena de equipos continúan o seu camiño cara á Coruña, a menos de 24 horas do peche da liña de chegada, mañá sábado 9 de outubro ao mediodía.
O Raid Gallaecia-AR World Championship 2021 continúa a conta atrás cara ao peche da liña de chegada, previsto para mañá sábado ás 12:00 horas, cando se cumpra xusto unha semana do pistoletazo de saída do pasado sábado 2 de outubro en terras de Monforte de Lemos (Lugo).
Cinco conxuntos galegos completaron o percorrido na súa totalidade, os 630 quilómetros da carreira máis dura do mundo. Trátase dos seguintes: Endurance (9º), Tracktherace (17º), Keltoi Balaena (20º) e dous do tres cuartetos do club Cornelios (32º e 34º) esperan en meta a SÉ Ciclos Ordes e Budiño Raid-Porriño.
O mellor deles foi o Endurance, na 9ª praza, con 4 días, 15 horas e 38 minutos. O cuarteto formado por Adri Moreira, Xota Sancosmed, Borja Varela e a ecuatoriana Dani Costa, xa cruzou a meta na xornada de onte xoves.
Na 17ª praza chegou á liña de meta do Paseo do Parrote da Coruña o Tracktherace, formado por Marcos Muíño, David Senra Eiroa, Arnau Julià e a brasileira Mariana Pontes. Este conxunto investiu 5 días, 8 horas e 18 minutos para cubrir todo o traxecto. Dúas horas e media máis tarde, cun tempo de 5 días, 10 horas e 45 minutos, atravesou a meta na 20ª posición o Keltoi Balaena, formado polos Marcos Varela, Felipe Pena, Juan Carlos Vázquez e Esther Hernández.
Ao fío das 17:00, cun tempo de 6 días, 4 horas e 42 minutos, finalizou a proba o Nutrisport-Tecfilter-Vizhoja-Cornelios, formado por Diego Fernández, José Manuel Araújo, Silvia Insua e Pablo Fernández. A súa posición, sempre falando de forma provisional ata que os xuíces revisen os roadbooks de cada equipo, é a 32ª. Pouco despois, no posto 34º, chegou outro dos equipos do club Cornelios, o Restaurante Porto Guardés-Vizhoja-Cornelios, composto por Pedro Álvarez, Francisco Javier Rivero, Verónica Romeu e José Manuel González. O seu tempo foi de 6 días, 5 horas e 48 minutos.
Dous equipos galegos máis seguen cubrindo o percorrido completo: a SÉ Ciclos Ordes, que ás 18:00 atopábase por Santa Cruz, e o Budiño Raid-Concello do Porriño, que a esa mesma hora era trasladado a Sada do mesmo xeito que varios equipos máis, debido ás malas condicións do mar no Pedrido (Concello de Bergondo), para iniciar desde alí a última sección.
No Raid Aventura o cuarteto estaba formado por 3 mulleres e 1 home
Pes Negros, Aromon, Talleres Mingos-Biziebike-Vizhoja-Cornelios (formando con dous compoñentes xunto a outros dous do MRC Mac Parkman Foundation estadounidense), Cousas Novas-Vilanova Raid e Gallaecia Raid Aventura (formado por tres mulleres e un home) son os outros cinco equipos galegos que cruzaron a meta, aínda que fóra de ránking despois de reincoporarse á carreira na localidade das Pontes (A Coruña) tras non pasar o corte que estaba ubicado no Concello de Quiroga (Lugo).
Algo máis dunha decena de equipos continúan en marcha a esta hora, polo que se espera que finalmente entren en ránking no Raid Gallaecia, o que quere dicir que cubriron absolutamente todo o percorrido, 49 conxuntos dos 90 que tomaron a saída hai case unha semana.
Os equipos participantes nesta cita veñen de precorren case medio cento de concellos galegos, pisando terreo na Galicia máis salvaxe nun mundial de raid de aventura épico. Os conxuntos, que deben ser mixtos fomentando así a incorporación das mulleres a esta disciplina, afrontaron nos tramos diferentes disciplinas deportivas: trail, BTT, kaiak de mar e de río, coastering e cordas.