O ascenso á Segunda División Feminina da RFEF a tempada 2021-2022 suporá para o conxunto do 5 Coruña Futbol Sala un grande esforzo económico, dende logo, un maior ao de tempadas anteriores.
Segundo explican desde o club herculino terán que conseguir “encaixar un orzamento no que apenas figuran colaboracións de entidades privadas como patrocinadores, nunha tempada de máxima esixencia económica debido a que é o único club coruñés na modalidade que conta con 3 equipos en categorías nacionais”.
Detallan desde o 5 Coruña Futbol Sala que ademais do xa mencionado equipo feminino que competirá na Segunda División Feminina da RFEF, o equipo senior masculino militará na Terceira División Nacional, e o Xuvenil DH que este ano ademais terá que competir nun formato de grupo único contra equipos de Castela e León, ademais dos rivais galegos.
Diante os gastos derivados, sobre todo, destas tres competicións de carácter estatal, o club rojillo vén de lanzar a súa campaña de captación de persoas socias para a tempada 2021-2022. Con esta campaña o 5 Coruña Futbol Sala espera poder contar co apoio dunha gran masa social que lle permita “cadrar o orzamento para a presente tempada”.
O club dispuxo na súa web un formulario da Campaña de Socias/os Temporada 2021-2022 | 5 Coruña F.S. (5corunafs.com)
Haberá dúas modalidades de persoas socias do 5 Coruña FS na campaña 2021-22:
- Socia/o Xeral (15 euros): Agasallo de camiseta oficial tempada 21/22
- Socia/o Premium (25 euros): Agasallo de camiseta oficial tempada 21/22 e toalla ou bolso 5 Coruña FS. As persoas socias Premium terán acceso de balde aos partidos de Segunda RFEF FutSal Feminina.
O carnet de persoa socia será virtual para gardar no terminal móbil e unicamente vencella á tempada 2021-22, segundo explican desde o club coruñés. Na web do 5 Coruña Fútbol Sala pódese obter información completa sobre esta campaña, así como ver as equipación ás que fan referencia.
