O Palau Velódromo Luis Puig de Valencia acollerá durante os días 13 e 14 desta fin de semana a disputa do Campionato de España Sub23 de Pista Cuberta onde haberá participación galega.
As restricións en canto ao número de participantes, fixo que das dazasete galegas e galegos inscritos orixinariamente tan só fosen admitidos a tomar parte nesta cita un total de dez: cinco rapazas e cinco rapaces.
Nas categorías femininas, destaca o talento provinte de dous clubs: Atletismo Femenino Celta e Sociedade Gimnástica de Pontevedra.
Unha das galegas que competirán son a atleta internacional e campioa de España no nacional Sub23 de aire libre do ano pasado Eva Queimaño, quen estará na loita polas medallas.
Por parte do equipo céltico estará Andrea Pais na proba dos 200 m. quen xa fora finalista no nacional de aire libre do ano pasado. Tamén estará no foso de área a subcampioa galega Sub23 Uxía Paz.
No club pontevedrés, as galegas da Sociedad Gimnástica que estarán son a subcampioa galega absoluta dos 60 m. Cristina Garrido na proba dos 200 metros e Lucía Ferrer nos valos, unha atleta que xa é campioa galega absoluta
A COVID-19 limita a competición
O evento, que contará con estritas medidas sanitarias e de prevención contra a COVID-19 desenvolverase sen asistencia de público e só accederán as persoas previamente acreditadas, que deberán pasar un test de detección de antígenos da COVID-19. Os Servizos Médicos da RFEA encargaranse da realización das probas.
Os resultados comunicaranse de maneira individualizada na propia instalación nun prazo aproximado de 15 minutos tras a toma de mostra e o resultado negativo permitirá a recollida da acreditación.
As probas masculinas e femininas, que se desenvolverán entre o sábado (10:30 a 19:00 horas) e domingo (10:00 a 19:15 horas), serán ofrecidas por streaming a través da plataforma de LaLigaSportsTV.
