A cuarta vitoria consecutiva do HC Deportivo Liceo, chegou na casa e ante un coloso da OK Liga Feminina: o Martinelia CP Manlleu por un tanteo de 1-0. As catalás, terceiras, so tiñan perdido dous partidos neste curso, esta fin de semana, na Coruña, colleitaron a súa terceira derrota.
Imposible comezar de mellor forma unha semana de tres partidos que, de momento, tradúcese en tres puntos unidos a un total de 22. Sírvenlle ó conxunto que adestra o técnico Stanis García para permanecer na sétima posición.
Foi, como cabería agardar, un encontro complicado para o HC Deportivo Liceo. Xogaba a favor das liceístas, iso si, a fatiga dun Martinelia CP Manlleu que 48 horas antes rematara outro compromiso. A igualdade foi a tónica dos 50 minutos, aínda que nos primeiros 25 xa case chegou o 1-0 local. Adriana Soto, desde o punto de penalti, non puido transformar.
A bóla parada, aínda así, foi a chave do triunfo do Liceo. Unha errada deu paso a outra marcada, esta vez, pola habilidosa Alba Garrote a falta dun minuto e medio para o final. O seu penalti acabou dentro da portería de Anna Ferrer despois dun disparo potente que fixo estoupar de xúbilo ás presentes. Así rematou.
Toda unha vacina de moral para as xogadoras dirixidas por Stanis García, que este mércores visitarán a outro poderoso rival: o Telecable en Gijón, a partir das 20:15 horas. Así, despois de vencer ás terceiras, as liceístas acuden ao feudo das segundas coa mesma intención de saír vitoriosas.
FICHA TÉCNICA
1) HC DEPORTIVO LICEO: Viki Caretta; María Sanjurjo, Alba Garrote, Adriana Soto e Cris Diz – quinteto inicial -. Tamén xogaron: Bea Gaete, Ale Martín, Luchy Paz, Lucía Yáñez e Mencía Mosquera.
2) MARTINELIA MANLLEU: Anna Ferrer; Nara López, Anna Casaramona, Elisabet Gurri e María Díez – quinteto inicial -. Tamén xogaron: Joana Comas, Anna Bulló, María Anglada e Abril Alonso.
GOL: 1-0 Alba Garrote, min. 49.
ÁRBITRO: Pablo Nicieza Elosegui. Sen cartóns.
INCIDENCIAS: Xornada 15 da OK Liga Feminina 21/22 disputada na Coruña.
