O IV Campionato de España Open de Fondo Máster celebrouse en Valladolid na pasada fin de semana, con grandes resultados para a natación galega. Catro nadadoras de tres equipos distintos subiron aos podios das súas probas, sumando un total de seis medallas.
O club galego máis laureado foi a AD Fogar. O seu equipo obtivo un ouro con Elisa Pichel, quen finalizou primeira nos 3000m libre na categoría de 35+, cunha marca de 38:56.29 sumando 19 puntos. A súa compañeira Cora Vinagre competiu nos 800m libre, quedando en terceiro lugar, con 14 puntos grazas a un tempo de 11:25.04.
Pola súa banda, o CN Liceo foi o conxunto galego mellor posicionado na clasificación por clubs desta proba de Fondo Máster. As coruñesas foron décimas grazas ás medallas de Sonia Braña: dobre prata en 3000m libre, cunha marca de 45:41.48 e 1500m libre, cun tempo de 20:28.89.
O medalleiro galego finalizou con María del Mar Terceiro, do Club del Mar, quen foi segunda nos 800m libre parando o reloxo nos 12:11.11 e terceira nos 1500m libre cun tempo de 23:19.43.
Tres nadadoras galegas máis competiron no Open de Fondo Máster
Tamén participou no IV Campionato de España de Fondo Máster a súa compañeira Paula Araujo, quen foi novena en dúas probas, a dos 800m libre e a dos 1500m libre. Por parte do CN Liceo competiu tamén María Regueira, con menos sorte que Braña, xa que finalizou en quinta posición nos 1500m libre e na cuarta nos 3000m libre. Finalmente, a participación galega complétase con Laura Marcos, do CN Rías Baixas, quen foi quinta nos 800m libre.
Podes consultar todos os resultados da competición nesta ligazón.
