- A cidade herculina volveu envorcarse nunha xornada solidaria e festiva dedicada a impulsar a investigación e a brindar apoio aos pacientes e familias que enfrontan o cancro.
- A cita reuniu a participantes de todas as idades nun percorrido urbano que permitiu desfrutar dalgúns dos puntos máis emblemáticos da cidade, acompañado de música, actividades deportivas e múltiples propostas de animación.
A Coruña volveu demostrar este domingo o seu compromiso coa loita contra o cancro na XIII edición da andaina solidaria A Coruña En Marcha Contra o Cancro, organizada pola Asociación Española Contra o Cancro (AECC). A cita reuniu a máis de 3.600 persoas nunha mañá chea de deporte, espírito festivo e solidariedade.
A zona de Porta Real, na Mariña, foi o punto de encontro dunha marea verde que, desde primeira hora da mañá, comezou a tomar parte do Paseo Marítimo. Unha imaxe cargada de significado na que, ademais, destacou un xesto especialmente emotivo: cada participante puido personalizar o seu dorsal da andaina, dedicando os seus pasos a alguén importante. Nomes de familiares, amigos ou mensaxes de apoio á investigación oncolóxica acompañaron cada paso, convertendo a marcha nun espazo compartido de recordo, homenaxe e esperanza.
Deporte, música e solidariedade ante o cancro
A xornada comezou cunha sesión de quecemento dirixida por instrutores de Termaria, antes da saída oficial ás 10.00 horas. A marea verde avanzou acompañada pola enerxía das batucadas dos Kilomberos de Monte Alto e a sesión DJ de Mas Music, que puxeron ritmo a unha xornada na que os participantes desfrutaron do paseo marítimo e dalgúns dos puntos máis emblemáticos da Coruña.
As sorpresas non faltaron durante a mañá, con repartición de agasallos entre os asistentes grazas ás entidades colaboradoras. O ambiente festivo mantívose coa apertura dunha zona de xogos pensada para os máis pequenos. Ademais, personaxes infantís de Superthings e da Lexión 501, contribuíron a animar o ambiente, especialmente entre o público familiar.
Para despedir a xornada o escenario acolleu unha sesión de salsation da man de Termaria, que invitou a seguir compartindo unha mañá de deporte e convivencia.
Máis de 90 persoas voluntarias da AECC, fixeron posible este evento solidario e colaboraron durante os días previos na organización da andaina,
“Cada ano esta andaina volve demostrar a implicación dos coruñeses e coruñesas fronte ao cancro. Hoxe vimos a miles de persoas camiñando xuntas, moitas delas portando no seu dorsal unha dedicatoria cun nome, un recordo ou unha mensaxe de esperanza, o que reflicte ata que punto esta causa forma parte da vida de todos” destacou Javier Álvarez Barbeito, presidente da Xunta Provincial da AECC Coruña.
“Esta resposta é fundamental, porque os fondos recadados hoxe destínanse integramente a proxectos de investigación e a servizos que apoian a pacientes e familias de forma gratuíta. Queremos agradecer a participación da cidadanía, así como o apoio de todo o voluntariado, empresas, entidades colaboradoras e institucións que fan posible esta xornada. Só desde ese compromiso colectivo poderemos seguir avanzando cara a un futuro con máis vida”, engadiu o presidente.
Polos pacientes e a investigación oncolóxica
O cancro é unha realidade que impacta a miles de persoas cada día. En España diagnostícase un novo caso cada dous minutos, e estímase que para 2030 haberá máis de 317.000 novos diagnósticos. Fronte a esta situación, a AECC traballa para mellorar a supervivencia, coa meta de superar o 70% para 2030. A Asociación ofrece na Coruña servizos gratuítos para pacientes e familiares (atención psicolóxica, atención social, fisioterapia, logopedia e nutrición).
Ademais, na provincia da Coruña a AECC conta actualmente con 38 proxectos de investigación activos, cun investimento que supera os 5,3 millóns de euros. Só no último ano destináronse máis de 1,3 millóns de euros a novas investigacións e ao impulso do talento científico para avanzar paso a paso cara a tratamentos máis eficaces e cara a unha mellor calidade de vida para as persoas que conviven co cancro.
Unha cidade unida fronte ao cancro
A XII edición da andaina A Coruña En Marcha Contra ou Cancro é posible grazas ao compromiso do Concello da Coruña, e ao patrocinio de entidades como:
- Vegalsa- Eroski
- Mastil Rotulación
- Andrones
- Miraveo
- Solán de Cabras
Así como á colaboración de numerosas empresas e colectivos que fan posible esta xornada solidaria, como:
- Agrupación industrial do Deporte Galego
- El Corte Inglés
- Tranvías da Coruña
- CSC
- Xeograf
- Termaria
- Castro Ópticos
- Mas Music
- Lexión 501
- Grupo Arc Eurobanan
- Innovisual
- Kilomberos de Monte Alto
- Grupo Breogán
- La Voz de Galicia
- La Opinión de A Coruña
- El Ideal Gallego
- DXT Campión
- Quincemil
- Radio Voz
- Radio Coruña Cadena Ser
- Radio Marca Coruña
- Fundación RC Deportivo
- Leyma Básquet Coruña
- Hóckey Club Liceo
- Empanada Viaxante
- Gadis
- AparcaT Palexco
- Alda Hoteles
- Cuartel Xeral do Mando de Apoio á Manobra
- Pixeling
- Club de Marcha Nórdica A Coruña
- Porto da Coruña
- HM Hospitais
Sobre a Asociación Española Contra o Cancro
A Asociación Española Contra o Cancro é a entidade de referencia na loita contra o cancro desde hai 70 anos. O cancro non só afecta a quen o padece, senón que impacta na súa familia, a súa contorna e en toda a sociedade. Afrontalo esixe unha resposta colectiva baseada no compromiso, a acción sostida e a investigación centrada nas persoas. Dedica os seus esforzos para mostrar a realidade do cancro en España, detectar áreas de mellora e poñer en marcha un proceso de transformación social que permita corrixilas.
No seu ADN está estar ao lado das persoas polo que o seu traballo tamén se orienta a axudalas a previr o cancro; estar con elas e as súas familias durante todo o proceso da enfermidade, se llo diagnostican; e mellorar o seu futuro co impulso á investigación oncolóxica.
Neste sentido, a través da súa Fundación Científica, a Asociación aglutina a demanda social de investigación contra o cancro, financiando por concurso público programas de investigación científica oncolóxica de calidade. A Asociación impulsa a maior rede de investigación en cancro en España con máis de 3.000 investigadores, distribuídos en 160 centros de investigación en 38 provincias. Hoxe en día, é a entidade social e privada que máis fondos destina a investigar o cancro: 157 millóns de euros en 792 proxectos.
A Asociación Española Contra o Cancro integra a pacientes, familiares, persoas voluntarias e profesionais que traballan unidos para previr, sensibilizar, acompañar ás persoas afectadas e financiar proxectos de investigación oncolóxica que permitirán un mellor diagnóstico e tratamento do cancro.
Estruturada en 52 Sedes Provinciais, e presente en máis de 2.000 localidades españolas, conta con máis de 35.000 persoas voluntarias, máis de 728.000 socios e 1.261 profesionais.
Durante o 2025, a Asociación Española Contra o Cancro atendeu a máis de 88.000 persoas cos seus servizos de atención profesionalizada.
