- O Torneo Intercentros é a competición galega deste perfil con máis equipos participantes e foi levado a cabo grazas á colaboración do Servizo provincial de Deporte Escolar coa Asociación Galega de Fútbol Gaélico.
- Previamente a esta competición a Asociación Galega de Fútbol Gaélico colaborou cos centros educativos dentro do seu proxecto Gaélico Escolas Punto Gal achegando material pedagóxico ao profesorado.
Entre o mércores, 12 de febreiro, e o venres, 14 de febreiro, disputouse no Campo de Fútbol da Universidade de Vigo o I Torneo Intercentros de fútbol gaélico, no que tomaron parte máis de 300 futbolistas de 1º da ESO de 11 centros educativos da cidade olívica.
Esta actividade enmárcase dentro do traballo coa base que se leva a cabo desde a Asociación Galega de Fútbol Gaélico (AGFG) a través das Gaélico Escolas PuntoGal e realizouse en colaboración co Servizo provincial de Deporte Escolar, que achegou a proposta aos centros educativos e facilitou a instalación e o transporte.
Esta competición mixta supuxo un éxito, tanto para organizadores como para participantes, algúns deles xa decididos a participar no Campionato Galego Escolar de fútbol gaélico que se desenvolverá en Vigo o vindeiro 22 de marzo e que contará con equipos de todo o territorio galego.
O calendario de competición foi o seguinte:
- 12/2/2025: Ricardo Mella, Barreiro, Monterrey e Alborada
- 13/2/2025: Santa Cristina, Bouza Brey, El Castro e San Miguel
- 14/2/2025: Labor, Mercantil e Vista Alegre
En cada unha das xornadas deste Torneo Intercentros os catro centros participantes xogaron oito encontros contra os seus rivais. Ao ser unha competición participativa non se consideraron clasificacións nin resultados finais, incidindo na importancia da inclusión neste deporte ao que se achegan moitos deportistas procedentes doutros deportes nos que o nivel de esixencia competitiva é moito máis acentuada.
Tras rematar o torneo o coordinador das Gaélico Escolas PuntoGal en Vigo e adestrador do Turonia Gondomar, Juan Fernández, destacou que “Galicia é unha referencia a nivel europeo, non só pola actividade que ten o fútbol gaélico a nivel sénior, senón tamén polo traballo coa base que se está a desenvolver desde a AGFG”.
Xornadas didácticas antes do Torneo Intercentros
Na tempada 2023-24 no fútbol gaélico en Galicia fíxose un esforzo para achegar esta modalidade á cativada, e neste curso 2024-25 o camiño é similar. Daquela a Asociación Galega de Fútbol Gaélico (AGFG) levou este deporte a 21 centros educativos nos que 2.153 escolares recibiron unidades didácticas sobre esta disciplina.
No caso do Torneo Intercentros de Fútbol Gaélico de Vigo tamén se fixeron visitas previas aos centros escolares, impartíronse catro sesións de fútbol gaélico nas aulas de educación física e subministrouse ao profesorado material pedagóxico para que poidan seguir traballando sobre esta material pola súa conta.
Torneo de Nadal PuntoGal en Boqueixón
Paralelamente, o mércores 12 de febreiro disputouse o Torneo de Nadal PuntoGal en Boqueixón, que contou coa participación do CPIP Antonio Orza Couto e do CPI Camiño de Santiago.
No canto dos habituais campos de fútbol, nestes torneos os partidos teñen lugar en pavillóns nun terreo de xogo de fútbol sala no que se xoga en equipos de cinco contra cinco.
Inauguración da canteira Turonia Gondomar
Tamén, durante pasada semana tivo lugar a inauguración da canteira do Turonia Gondomar. O club ten neste momento as inscricións abertas para todos os nenos e nenas, a partir de 10 anos, que desexen apuntarse. As xornadas de canteira terán lugar todos os mércores, de 16:30 a 18:30 h, no campo das Gaiandas de Gondomar sendo completamente de balde durante os meses de febreiro e marzo.
Sobre a Asociación Galega de Fútbol Gaélico (AGFG)
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
