A Primeira División de futsal deu por finalizada a primeira fase competitiva e adéntrase esta fin de semana na segunda. Nela, oito clubs competirán polo título de campión, entre eles tres galegos: Poio Pescamar, Ourense Envialia e Pescados Rubén Burela que defende o título xa que as Guerreiras Laranxas son as vixentes campioas. No outro lado da moeda dez equipos o farán por non descender, entre os que están dous de Galicia: Viaxes Amarelle FSF e Cidade de As Burgras.
Estes novos subgrupos C (polo título) e D (polo descenso) están conformados segundo os coeficientes e non os puntos obtidos nos partidos da primeira parte da competición. A explicación a esta medida está en que, debido á pandemia, non todos os equipos puideron disputar todos os encontros previstos.
Foi o caso do Viaxes Amarelle, que tivo que suspender o seu último partido, ao detectar un gromo de COVID-19 nas súas filas. Tampouco puido competir na última xornada o Cidade de As Burgas, que viu suspendido o duelo co Penya Esplugues.
Galicia e Madrid, empata a equipos no grupo polo título
No primeiro destes subgrupos de futsal, estarán o vixente campión de Liga e Copa, o Pescados Rubén Burela, o subcampión de Copa da Raíña, o Poio Pescamar, e tamén o Ourense Envialia. As laranxas remataron líderes no seu grupo, atendendo á puntuación, mentres que no outro, as pontevedresas foron terceiras, seguidas na cuarta posición polas ourensás.
Estes tres cadros galegos cruzaranse con Futsi Atlético Navalcarnero (Madrid), invicto na primeira fase e, previsiblemente, un dos ósos máis duros de roer nesta (canda menos sobre o papel), STV Roldán (Murcia), Melilla Sport Capital Torreblanca (Melilla), AD Alcorcón (Madrid) e FSF Móstoles (Madrid).
Así, no reconto de representantes por comunidades Madrid e Galicia con tres equipos cada unha, son os territorios que aportan un maior grupo de equipos á loita polo entorchado, ao que tamén fan achegas Murcia e Melilla.
A data prevista para que finalice esta fase polo campionato é o 29 de maio.
A cita destacada da xornada 1: duelo galego entre Envialia e Burela
A cita máis destacada deste primeiro fin de semana da segunda fase será o encontro entre o Envialia e o Burela. Este será o primeiro partido galego na competición regular de futsal para as laranxas, que no seu grupo non tiñan competidoras irmandiñas. Pero non será a primeira vez que se midan ás ourensás que adestra Morenín neste curso. Xa se viron as caras na ida das semifinais de Copa Galicia (0-0). Xustamente o desempate, o partido de ida, vaise xogar antes de comezar esta fase competitiva da Liga estatal.
Pola súa banda, o propio Poio Pescamar comeza esta fase contra o Melilla Sport Capital Torreblanca.
Na segunda xornada, outro duelo galego protagonizará a fin de semana, enfrontando en Vista Alegre a Burela e Poio Pescamar, xa no 3 de abril. Como no caso do Envialia, Pescados Rubén Burela e Poio Pescamar xa mediron forzas esta tempada e o fixeron loitando polo título de Copa da Raíña do curso pasado (a competición quedar pendente de disputa polo parón que motivou a COVID-19). O resultado foi un trunfo pola mínima das da Mariña que sumaron un trofeo máis para as súas vitrinas.
A loita por evitar o descenso
No outro grupo desta segunda fase de futsal, o grupo D, estarán as coruñesas do Viaxes Amarelle FSF e as ourensás do Cidade de As Burgas. Ambos competiron no mesmo grupo, no cal as primeiras quedaron sétimas e as segundas colistas.
O Amarelle vén de reforzarse para esta recta final da competición coa chegada de Sofía Florentín, unha peche internacioal arxentina que, se ven xoga na zona de atrás, ten moito gol polo seu potente disparo.
Estes conxuntos galegos competirán contra outros oito: Universidad de Alicante, Xaloc Alacant, Penya Esplugues, Gran Canaria Teldeportivo, Intersala Promesas Zaragoza, Sala Zaragoza, Rayo Majadahonda e CD Leganés. Previsiblemente, as xornadas deste subgrupo rematarán o 12 de xuño.
Na primeira xornada, o Cidade visitará ao Universidad de Alicante e o Amarelle ao Rayo Majadahonda.
Burela e Envialia, os únicos galegos na Fase Final da Copa da Raíña
