Hoxe, sábado día 10 de xuño ás 17.00 horas no Pavillón Municipal Vista Alegre, disputarase o segundo encontro da semifinal galega do play-off polo título na Primera Federación Feminina de Futsal da RFEF. No chamado Derbi das Costas, o Pescados Rubén Burela FS e o Poio Pescamar FS volverán a verse as caras. O encontro poderá seguirse ao vivo en Live Vuvuzela e na TVG g24.gal/deportes
Despois dun primeiro encontro en Poio con vitoria para o equipo laranxa, esta fin de semana as Guerreiras Laranxas tentarán por todos os medios pasar á final arroupadas pola súa xente. Xusto o que buscará evitar o conxunto conserveiro que chega a terras da Mariña coa idea de forzar o terceiro partido e facer valer o factor cancha na Seca.
O conxunto que adestra Julio Delgado confía na forza da bancada laranxa e na vantaxe que lle supón o 1-3 do partido de ida na Seca.
Ver esta publicación en Instagram
En referencia aos enfrontamentos en Vista Alegre entre ambos os clubs, a bagaxe é de 8 vitorias locais e 2 empates. Ademais, o Pescados Rubén Burela venceu na Supercopa de España da campaña 2020 / 2021, que se celebrou alí. É certo que nas últimas visitas o Poio Pescamar mellorou e, de feito, un dos empates foi o sumado neste curso. Así, o reto de manterse con vida no play-off pasa, no caso do Poio Pescamar por gañar por primeira vez na súa historia en Burela.
Ver esta publicación en Instagram
Samper: “O Poio Pescamar ten moi boa defensa”
Irene Samper ofrecía na previa do Derbi das Costas as súas impresións sobre o rival, o Poio Pescamar: “Creo que é un equipo que estivo traballando moito e ben, así se ve nos resultados que están tendo. Teñen un equipo cunha moi boa defensa, por iso é polo que non encaixen moitos goles, a súa principal virtude é esa, pero tamén ten grandes xogadoras en xeral”.
Sobre o seu equipo, Irene Samper declaraba: “Eu creo que o traballo xa está feito, é verdade que sempre se pode mellorar, pero creo que imos por un bo camiño. Levamos unha tempada moi boa e queremos seguir mellorando certos aspectos que sempre se poden mellorar”.
Ver esta publicación en Instagram
No equipo conserveiro, o adestrador Luis López-Tulla apuntaba na rolda de prensa previa ao partido que tiña moitas ganas de xogalo. O técnico agarda en Vista Alegre un partido moi igualado e agarda que nin laranxas nin vermellas acusen o cansanzo e que ambos os dous conxuntos cheguen á cita de Burela en plena forma.
Ver esta publicación en Instagram
Preto dun cento de seareiras do Poio Pescamar desprazaranse a terras da Mariña, “lembrando o gran movemento que hai 10 anos fixemos ata Rubí, Barcelona, para remontar a eliminatoria que nos deu o ascenso a Primeira División. Confiamos en que o espírito de Rubí volva sinalar o camiño”, recordan desde o club conserveiro.
Julio Delgado, adestrador do Burela: “É moi difícil facerlles gol”
Para Julio Delgado, adestrador do Pescados Rubén Burela, gañar o primeiro partido foi un paso moi importante, “dános a tranquilidade de afrontar este segundo partido e en caso de perder ter a oportunidade dun terceiro, elas van vir un pouquiño máis presionadas, saben que o sábado para elas vai ser un partido a vida ou morte”.
Sobre o Poio Pescamar “unha das súas características principais é que é un equipo moi serio, madurou moitísimo este ano. Céntranse moitísimo no aspecto defensivo e están sendo moi duras, un equipo moi rochoso, é moi difícil facerlles gol”.
Ver esta publicación en Instagram
E ao respecto do bloque de xogadoras que adestra, Julio Delgado declaraba na previa deste Derbi das Costas do futsalfem: “sempre se pode mellorar, a capacidade de mellora sempre está aí, pero hai que lembrar que entramos no undécimo mes de competición e agora practicamente focalizamos o traballo en que cheguen o mellor posible ao sábado, coa carga xusta para que cheguen a un nivel óptimo e puntualizando en pequenos detalles que nos poden facer mellores o sábado. O traballo xa se fixo en pretemporada e nos primeiros meses de tempada e agora é puntualizar cousas moi concretas.
Cre Julio Delgado que hai que traballar moito a nivel psicolóxico durante toda a semana para que as xogadoras sentan a gusto neste Derbi das Costas. “Están facendo un esforzo enorme nesta tamporada tan longa e non imos esquecernos do táctico e do técnico pero sobre todo o aspecto psicolóxico, reforzar o grupo, que ao fin e ao cabo é o que nos vai dar a vitoria os sábados”.
Apuntaba o técnico das Guerreiras Laraxas que a afección gozará enórmemente do partido, “van dar moito como sempre, imos ter o seu apoio o seu empuxe e imos dedicarlle este triúnfo a esta afección que sempre nos apoiou e que está desexando que entremos noutra final. Co apoio da afección creo que imos conseguilo e imos disputar outra final dun título de Liga”.
