O Diario Oficial de Galicia vén de publicar a resolución do 3 de novembro de 2025 pola que se conceden as subvencións da Xunta para a adquisición de equipamentos deportivos destinada ás entidades deportivas de Galicia.
En total, foron 287 entidades -249 clubs e 38 federacións- as beneficiarias dunhas axudas que acadaron máis de 1,4 millóns de euros. O reparto foi de 1,2 millóns para clubs e 200.000 euros para federacións.
En concreto houbo dúas liñas de axudas destinadas a mobilidade para embarcacións e vehículos (cun máximo de 10.000 euros), así como as de non mobilidade, tanto específico da práctica deportiva como non específico (material de ximnasio, desfibriladores, marcadores ou sistemas de cronometraxe) que tiña un máximo de 5.000 euros.
Reparto das axudas da Xunta para equipamento por provincias
Máis polo miúdo, a distribución dos 1,4 millóns de euros por provincias foi a seguinte:
- A Coruña repartiu 438.300 euros a clubs e 67.500 euros a federacións
- Lugo 126.900 para clubs e 6.600 para federacións
- Ourense 76.700 a clubs e 32.500 a federacións
- Pontevedra 554.300 a clubs e 102.400 a federacións.
Cómpre salientar que a Xunta sacou en 2023 a primeira orde específica de subvencións para equipamento adaptado, chegando a 46 clubs con licenzas de discapacidade cun crédito orzamentario de preto de 227.000 euros.
En 2022, ademais, o Goberno galego investiu máis de 4,6 millóns de euros para a adquisición de equipamentos deportivos, sendo o máximo histórico anual dirixido a este obxecto.
En total, dende o ano 2009, a Xunta leva consignados preto de 12 millóns de euros a equipamento deportivo.
