- Lete Lasa pon en valor o papel do Real Club Náutico de Portosín na vela galega na presentación da XXV Regata Ramiro Carregal – Gran Trofeo Faro de Corrubedo.
- O secretario xeral para o deporte gaba a figura de Ramiro Carregal, “un dos grandes persoeiros da empresa galega que, aos seus 98 anos, segue a realizar un labor crucial no eido deportivo promovendo esta regata dende o ano 2000”.
O secretario xeral para o Deporte, José Ramón Lete Lasa, participou na mañá de hoxe na presentación da XXV Regata Ramiro Carregal – Gran Trofeo Faro de Corrubedo que terá lugar esta fin de semana do 28 e 29 de xuño, organizado polo Real Club Náutico de Portosín e o Club Náutico Deportivo de Riveira e que conta co apoio da Xunta de Galicia.
Nas súas verbas, o mandatario galego puxo en valor o papel do Real Club Náutico de Portosín na vela galega e falou dos seus importantes regatistas como Iago López Marra, un dos once olímpicos galegos, que acadou un diploma en Toquío 2020.
Ademais sinalou a importancia do apoio aos deportistas de Galicia como ten realizado a Xunta de Galicia nos distintos ciclos olímpicos de grandes regatistas adquirindo barcos para a súa preparación como foi o caso de Antón Paz, Nico Rodríguez, Támara Echegoyen, Sofía Toro, Tomás Vieito, Patricia Suárez ou o propio López Marra. Neste sentido gabou a figura de Ramiro Carregal, “un dos grandes persoeiros da empresa galega, gurú das conservas e que, aos seus 98 anos, segue a realizar un labor crucial no eido deportivo promovendo esta regata dende o ano 2000”.
José Ramón Lete Lasa desexou a mellor das sortes aos 25 cruceiros da clase ORC que se disputarán esta fin de semana un trofeo que representa ao Faro de Corrubedo e que na primeira edición xa acadou un cruceiro local, o Tango Sagres de Francisco Gude que repetiu o ano pasado a bordo do Siradella.
