Fai unh datas a a World Athletics facía pública a relación de xuíces designadas e designados oficialmente para tomar parte nos vindeiros Xogos Olímpicos de París 2024 do vindeiro mes de agosto e nesa relación figuran ata cinco xuíces españois internacionais dos cales dúas son as galegas Dolores Rojas e Loreto Pérez.
Serán os cuartos Xogos para Dolores Rojas
Para Dolores Rojas esta designación representan nada menos que os seus cuartos xogos logo de ter tomado parte nas edicións de Atenas 2004, Londres 2012 e Toquio 2020 o que a convirten por palmarés, na xuíza galega máis importante da historia do noso deporte, tal e como salientan desde a Federación Galega de Atletismo.
A traxectoria desta coruñesa, moi ligada á marcha, fai dela unha peza clave para entender a evolución do G.P. Internacional de Marcha Cantones de A Coruña que conta desde o 2019 ca distinción de Patrimonio Mundial do Atletismo outorgada pola World Athletics. A maiores conta cun dilatado palmarés no que acumula un bo número internacionalidades así como numerosos cargos de responsablidade a nivel federativo.
Loreto Pérez, será xuíza de apelación nos XX.OO. de París
Outra das galegas que estará presente na capital francesa é a viguesa Loreto Pérez quen está designada para tomar parte como xurado de apelación.
A súa traxectoria daba comezo no ano 1989 a raíz do cal iría acumulando unha ampla experiencia e ascensos que a farían asistir a citas internacionais tales como o Campionato Mundial Universitario en China, o Campionato do Mundo de Budapest e o Campionato de Europa de Pista cuberta en Belgrado.
De igual modo Loreto Pérez tomou parte no Campionato do Mundo Sub20 celebrado en Colombia, actuando como delegada técnica en numerosos encontros internacionais nos últimos anos.
Na actualidade ámbalas dúas son xuíces nivel 3 RFEA, estando a nivel internacional no máximo escalafón da súa categoría, World Athletics Referee Gold Level.
Xuíces galegos en xogos olímpicos
O debut de xuíces galegos e galegas nuns xogos olímpicos, remóntase a unha data relativamente recente xa que foi na edición de Barcelona-92, onde acudiron por vez primeira nada menos que un total de 17 das nosas e nosos representantes.
Desde entón, tan só Dolores Rojas repetiría designacións nos certames de Atenas 2004, Londres 2012 e Toquio 2020 sumando novemente catro anos despóis, o que serán os seus cuartos xogos en París 2024 xunto a Loreto Pérez Román quen, pola súa banda, debuta nunha cita olímpica.
