Nun día tan sinalado como o 8 de marzo, a Federación Ciclismo Galego (FCG) anuncia a segunda edición das ‘Xornadas de Tecnificación Mulleres Ciclistas’. Logo do éxito que supuxo a súa estrea o pasado mes de setembro, o gran cumio do ciclismo feminino celebrarase neste 2023 durante a Semana Santa, o 5 e o 6 de abril. O municipio pontevedrés de Marín repetirá como sede.
As instalacións do Colexio SEI San Narciso volven acoller esta iniciativa coa que a FCG deu un paso máis na súa aposta polo binomio muller e bicicleta. Aumentar os coñecementos teórico-prácticos e crear vínculos entre as corredoras a través da convivencia son as dúas principais metas a alcanzar nesta xuntanza dirixida a ciclistas de todas as categorías de base e de todas as modalidades.
#CiclismoGalego | As Xornadas Mulleres Ciclistas celebran a súa segunda edición o 5 e o 6 de abril no @ConcellodeMarin
🚴♀️🚵♀️ A gran xuntanza feminina organizada pola FCG repite formato con charlas, adestramento de todas as modalidades e coloquio
🔗 https://t.co/R4VeuDLJo3 pic.twitter.com/BsIeI3ikb2
— F_Galega de Ciclismo (@F_Gal_Ciclismo) March 8, 2023
Segundo informa a Federación Ciclismo Galego (FCG) “nos vindeiros días os clubs recibirán as convocatorias para inscribirse nesta actividade gratuíta, que inclúe aloxamento e pensión completa”.
As ‘Xornadas de Tecnificación Mulleres Ciclistas’ presentan un formato similar ao da súa primeira edición e contan de novo cun cadro de poñentes de luxo. As charlas formativas impartiranas Gema Pascual (presidenta da Comisión nacional de ciclismo feminino e Seleccionadora española de ciclismo feminino en ruta), José Ramón Lillo Bevia (doutor en Ciencias da Actividade Física e do Deporte) e Coral Fernández Gumiel (xefa de División na Comisión Española para a Loita Antidopaxe no Deporte (CELAD)).
Coloquio nas ‘Xornadas de Tecnificación Mulleres Ciclistas’
Tampouco faltará o coloquio no que participarán mulleres vinculadas de diferentes formas a este deporte. Con Terio Carrera (presentador da Televisión de Galicia) exercendo de moderador, compartirán as súas experiencias no mundo do ciclismo Pilar Pavón (médica en voltas ciclistas), Dolores Cuñarro (árbitra de categoría nacional), Eva Castro (seleccionadora de Galicia de especialidades gravity) e Luz Iglesias (fotógrafa en eventos de ciclismo).
“O programa destes dous días complétase cun adestramento de todas as modalidades. A realización destas xornadas é posible grazas ao inestimable apoio do Concello de Marín, anfitrión, e da súa Concellería de Deportes. Grazas a súa implicación, Marín volverá converterse na capital galega do ciclismo feminino”, resaltan desde a FCG.
