Ao remate da décima xornada da Liga Iberdrola de voleibol, o Arenal Emevé está preto dos postos de Copa, dentro do top 6, e con dúas das súas xogadoras no sete ideal da xornada. Yael Castiglione e Jimena Gayoso lograron entrar no equipo titular que mellor xogou na fin de semana, coa última delas acando o MVP.
Gayoso liderou ás loitadoras no partido ante o Feel Volley Alcobendas, vixente campión da Copa da Raíña. Durante o encontro, a xogadora das lucenses foi a máxima anotadora, atacante e sacadora, un dos aspectos máis relevantes no xogo do Emevé, como resaltaría máis tarde o seu adestrador José Valle: “Fixemos un partido bastante completo, sobre todo sacamos moi ben”.
A xogadora foi quen de sumar 29 puntos e seis saques directos. No rol de colocadora, Castiglione tamén entra neste sete ideal, que se completa con Rocío Gómez, do Haro, Iva Pejkovic, do Avarca, Jenelle Jordan, do La Laguna, Paula Carpintero, do Kiele, e María A. Gomila, tamén do Avarca.
“Temos que seguir gañando, porque a liga é moi longa”
Ao remate da vitoria das loitadoras do Emevé, o seu preparador, José Valle, aseguraba que “temos que seguir gañando, non só para entrar na Copa, senón porque a liga é moi longa. Restaba esta e outra xornada para rematar a primeira volta e non podemos perder de vista outro obxectivo que temos en mente a longo prazo que é o playoff. Temos que seguir loitando cada partido e cada punto para seguir sumando opcións de entrar no playoff final”.
José Valle: “Non podemos perder de vista outro obxectivo que temos en mente a longo prazo que é o playoff”
No relativo ao encontro ante o Alcobendas, o adestrador sinalaba o saque como clave da vitoria, cunha excelente presión das súas xogadoras. Ademais, este duelo supuxo a volta á pista de Carolina Camino despois da súa lesión: “Fáltalle coller ritmo en ataque pero foi moi importante para o equipo”.
Sobre ela destacou a súa actuación na recepción, sinalando que “en ataque non puntuou con tanta facilidade como antes de mancarse, pero hai que valorar moitos balóns que atacou e tivemos posibilidade de reconstruír nós facendo efectivo o punto”. A xogadora do Emevé foi destacada como a terceira mellor sacadora da xornada.
De cara ao vindeiro encontro, que enfronta ás lucenses co Cajasol Vóley Dos Hermanas, Valle apunta que “é outra final. Sevilla é un equipo reforzado, que fichou a unha nova oposta, que sempre remata xogando ben e ten a un adestrador que é unha eminencia e un estudioso do volei e vai sabelo todo de nós. Temos que ir alí e xogar como o equipo que estamos sendo, presionalas co saque tamén porque aí temos a clave para gañar”.
José Valle: “Temos que ir (a Sevilla) e xogar como o equipo que estamos sendo, presionalas co saque tamén porque aí temos a clave para gañar”
O Arenal Emevé, colócase no top-6 tras vencer ás campioas da Copa
