A Selección Española de fútbol sala feminino repetía triunfo ante a de Portugal no segundo amigable que ambos os dous equipos disputaron neste arranque de ano. O 3-2 tivo un marcado acento galego. Un dos goles anotouno a galega Vane Sotelo, e os outros dous Dany e Irene Samper, xogadoras do conxunto da Mariña lucense Pescados Rubén Burela.
No seu camiño de preparación de cara ao Europeo feminino, España e Portugal demostraron que están listas para unha cita tan importante como o entorchado continental. O segundo duelo entre ambas seleccións estivo de novo protagonizado pola intensidade e a seriedade ante o máximo rival. Un duelo que se podería repetir en Debrecen, pero entón xa con moito máis en xogo.
Hai que lembrar que para a cita, Clàudia Pons citou a cinco son as futbolistas galegas: Vanessa Sotelo (Futsi Atlético Navalcarnero), Ale de Paz e Silvia Aguete (ENCE Marín Futsal), Martita e Luci (Poio Pescamar). Ademais o Pescados Rubén Burela aportaba tres xogadoras: Irene Samper, Peque e Dany.
Se un día antes foi Portugal quen se puxo por diante no marcador, esta vez foi a Selección Española a primeira en golpear. Iso si, tras varias ocasións das lusas, que por momentos atopáronse mellor sobre a pista.
Un disparo ao pau de Inês Fernandes, unha dobre parada de Silvia Aguete a María Pereira e un balón ao que non chegou Cátia Morgado foron as súas mellores ocasións antes do gol de Dany (Pescados Rubén Burela). A Selección Española ameazara cunha ocasión de Irene Córdoba, pero o tanto tivo que chegar a balón parado, nun disparo afastado da pivote, que sorprendeu a Odete Rocha.
Na segunda parte España saía mellor ao partido e aínda que foi Inês Fernandes a primeira en ameazar, o gol volveu caer ao lado español. Irene Samper (Pescados Rubén Burela) apareceu na área rival para roubar e poñer o 2-0.
En 43 segundos dous roubos de balón servíronlle a Portugal para empatar. Primeiro un de Ana Azevedo, que serviu a Inês Matogueiras para marcar e despois outro de Janice Silva, que tras unha parede fixo o 2-2. E cando máis se acenderon as alarmas en España foi cando apareceu a goleadora galega, Vane Sotelo. Seu foi o 3-2 ao rebañar un balón tras varios rexeites e tras marcharse de dous rivais, superar á meta lusa.
España defendeuse ben, soubo apertar os dentes e marcharse de Jaraíz de la Vera con dúas vitorias ante Portugal no peto.
Aniversario de Silvia Aguete coa Selección Española
O partido coincidía co 36 aniversario da porteira galega Silvia Aguete que recibiu o cariño e parabéns non só das súas compañeiras, tamén do público. Unha nena e un neno achegáronse a entregarlle un agasallo á meta do (ENCE Marín Futsal).
O mellor regalo para Silvia Aguete foi o triunfo da Selección Española e que mantivo a súa meta a cero os 20 minutos que estivo en pista defendendo a portaría de España.
FICHA TÉCNICA
3) ESPAÑA: Silvia Aguete, Mayte Mateo, Melli, Irene Samper e Vane Sotelo – quinteto inicial -. Tamén xogaron: Ale de Paz, Luci, María Sanz, Irene Córdoba, Noelia, Dany, Martita e Marta Balbuena (p.s.).
2) PORTUGAL: Odete Rocha, Cátia Morgado, Inês Matos, Ana Azevedo e Carla Vanessa – quinteto inicial -. Tamén xogaron: Janice Silva, Sara Ferreira, Fifó, Inês Fernandes, Pisko, María Pereira, Carolina Rocha, Ana Pires e Marta Costa (p.s.).
GOLES: 1-0 15′ Dany. 2-0 27′ Irene Samper. 2-1 30′ Inês Matos. 2-2 31′ Janice Costa. 3-2 32′ Vane Sotelo.
EQUIPO ARBITRAL: Héctor Mayo López e Jorge Moreno Durán. Amonestaron á futbolista local María Sanz.
INCIDENCIAS: Encontro amigable disputado no Pabellón Municipal de Jaraíz de la Vera (Cáceres) como preparación de cara ao Europeo de fútbol sala feminino de 2023. O partido coincidía co 36 aniversario de Silvia Aguete, porteira galega da Selección Española, que recibía un agasallo.
