- A Agrupación industrial Galego dá Industria do Deporte e o Benestar presentou en Sportur Galicia o seu proxecto para sacar do sedentarismo a 700.000 persoas.
- Os sete grandes concellos galegos xa forman parte do movemento impulsado pola Agrupación industrial e traballarán para incentivar a práctica deportiva.
A Agrupación industrial Galega da Industria do Deporte e o Benestar presentou oficialmente o seu “Plan 2 Millóns”, un proxecto nado co propósito de incentivar a práctica de actividade física. A industria galega do deporte fixouse o obxectivo de activar a 700.000 galegos e galegas antes de 2030, un reto que levaría a Galicia a contar con 2 millóns de persoas activas.
Sofía Toro, xerente da Agrupación industrial, afirmou que “se cumprimos este ambicioso reto, Galicia estaría en cifras similares ás dos países nórdicos e seriamos a comunidade autónoma con maior porcentaxe de práctica deportiva”.
No marco de Sportur Galicia, o clúster galego da Industria do Deporte e o Benestar explicou a orixe da iniciativa e as importantes implicacións económicas e sociais que ten o lanzamento deste movemento, que pretende involucrar a toda a sociedade. “Entendemos este proxecto como unha estratexia común para todos os galegos e galegas, o éxito será colectivo”, resaltou unha Sofía Toro que tamén sinalou que “queremos inculcar valores de vida saudables”.
O conxunto da industria do deporte ponse ao dispor da cidadanía para impulsar este Plan 2 Millóns, que ten como obxectivo principal mellorar a saúde da poboación galega. Ademais, a súa posta en marcha ten tamén un importante impacto na economía galega. Segundo as cifras expostas pola xerente, “activar a 700.000 persoas implicará un aforro de 700 millóns de euros en gasto sanitario, un aumento de 140 millóns anuais no volume de negocio da industria do deporte e unha xeración de máis de 2.000 postos de traballo”.
O reto proposto pola industria do deporte xa está lanzado e a partir de agora articularanse diferentes accións para promocionar a actividade física, facilitar o acceso ao deporte e educar en valores saudables. Ao longo do ano 2024 comezarán a desenvolverse as primeiras accións dun movemento que se iniciou coa creación do Observatorio Gallego do Deporte, creado pola Agrupación industrial co fin de levar a cabo investigacións que sirvan para ter datos reais e fiables que axuden a tomar as mellores decisións.
No marco do Observatorio Gallego do Deporte, as persoas investigadoras da Agrupación industrial xa publicaron os seus primeiros informes, un sobre a práctica deportiva na poboación galega e outro sobre o estado de saúde da nosa sociedade.
Sete grandes concellos galegos, co plan 2 millóns da Industria do Deporte
Sofía Toro anunciou durante a presentación que “todos os grandes concellos de Galicia, cos cales levamos a cabo reunións de traballo no último mes, manifestaron o seu compromiso de sumarse ao Plan”. De feito, xa comprometeron a súa adhesión ao proxecto os concellos de:
- Pontevedra.
- Lugo.
- Santiago.
- Ferrol.
- A Coruña.
- Ourense.
- Vigo.
