A cidade de Sarajevo acolle este xoves e venres o campionato Europeo sénior de pesos olímpicos de taekwondo, a única gran competición deste deporte que se celebrará no 2020. Como representación galega da Federación, Sara Cortegoso, Arlet Ortiz e Iván García participarán neste torneo.
As restriciones ás que está obrigando a pandemia de COVID-19 limitan o alcance deste tipo de competicións. Por iso, decidiuse que só participasen nel as categorías de pesos olímpicos, polo que os resultados non puntuarán para o ránking mundial.
As deportistas destacan as ganas por volver á competición de taekwondo
Sara Cortegoso está concentrada no CAR de Sant Cugat dende o 13 de xullo, traballando duro e afortunadamente sen ningún tipo de incidencia pola COVID-19. Sara, que participará no peso de -49 kg, explicou que “síntome preparada e motivada para este campionato e sobre todo con moitas ganas de competir e gozar do evento”.
A deportista destacou o nivel do Europeo de taekwondo, aínda que “como non é puntuable para o ránking, penso que todos iremos sen esa presión de xogarnos puntos, pero si con ganas de dalo todo e facelo o mellor posible”. Sara, unha das maiores promesas da Selección Española, realizará a pesada este xoves e competirá o venres, igual que a súa compañeira de Federación.
Arlet Ortiz, que está adestrando no CGTD en Pontevedra, tamén está desexando volver á competición de taekwondo: “Penso que estamos facendo un moi bo traballo e síntome preparada para competir”.
Como todos, dende marzo non participa nun campionato, polo que “estou con moitas ganas de volver a ter esas sensacións. Sei que despois de tanto tempo pode que as sensacións non sexan as mellores, pero estou desexando afrontar este novo reto e intentar facelo da mellor maneira posible”. Arlet tamén competirá o venres.
Antes delas, competirá Iván García. O deportista disputa a súa categoría (+80kg) o xoves, 10 de decembro. García tamén estivo adestrando no CGTD e destacou as súas ganas de voltar á competición.
