A cuarta xornada da Primeira División da RFEF do Fútbol Sala Femenino estatal conta con dous partidos que son derbi galego. O CD Burela FS vs Ourense Envialia, o sábado en Vista Alegre, e o Viaxes Amarelle FSF vs Poio Pescamar FS na mañá do domingo 2 de outubro (12:00 horas) no Pavillón Municipal da Sagrada Familia da Coruña.
Será o primeiro derbi galego da tempada para as coruñesas do Viaxes Amarelle FSF e tamén para as pontevedresas do Poio Pescamar, un dos conxuntos que neste curso aspira a todo.
O conxunto herculino do Viaxes Amarelle FSF, dirixido por Jorge Basanta, dirimirá na mañá deste próximo domingo, 2 de outubro, o primeiro derbi galego da tempada, e farao recibindo a un dos aspirantes para loitar polos postos de play-off da competición estatal. O derbi galego dominical celebrarase a partir das 12:00 horas, no Pavillón Municipal de Sagrada Familia da Coruña.
O conxunto coruñés vén de non disputar encontro a pasada fin de semana, con motivo do aprazamento do seu encontro contra o Gran Canaria FSF Teldeportivo polo peche de instalacións na illa canaria polo temporal que sufriron durante toda a fin de semana, e provocou multitude de incidentes e cancelacións de voos ás illas.
O equipo galego seguiu traballando dunha maneira constante durante a semana e aspira a facer un bo duelo contra un rival complicado; e para iso Jorge Basanta poderá dispoñer da totalidade do bloque de xogadoras, fóra de Estela Cantero e Carlita, que seguen sendo baixa; ademais da xogadora brasileira Tety, que se esperaba que chegase na mañá de onte venres á cidade herculina.
O rival que estará enfronte para o conxunto herculino, é o Poio Pescamar FSF. Falamos dun conxunto que aspira a todo. A pasada tempada quedou ás portas de disputar o play-off polo título de liga. Neste novo curso 2022-23 o conxunto vermello é un dos equipos que máis se reforzou para loitar precisamente ese obxectivo.
O Poio Pescamar chega á Coruña para xogar este derbi galego con moi bos resultados no peto. Ata a data conta os seus partidos por goleadas, salvo a súa derrota en casa do campión da pasada tempada, o Futsi Atlético Navalcarnero (un ano máis, intratable). No conxunto poiense hai varias caras coñecidas, e ex xogadoras, das herculinas como son Lucía Gómez, Martita e Anna Escribano.
Nesta nova tempada ambos os conxuntos enfrontáronse nun amigable de pretemporada, e onde as herculinas sufriron unha dolorosa goleada por un marcador de 6-1. Nese cruce de preparación o conxunto do Poio Pescamar estivo moi acertado para gol.
O conxunto herculino tratará de conseguir sumar os seus primeiros puntos como local nesta competición ligueira e sorprender a un rival que aspira a todo nesta competición. Toca gozar sobre a cancha e pelar polos puntos na mañá do domingo 2 de outubro de 2022 no Pavillón Municipal de Sagrada Familia (A Coruña).
A estas alturas da competición o Poio Pescamar é quinto e as coruñesas, décimas na clasificación da Primera División do FSF da RFEF.
Posibilidade de ver este derbi galego na TVG2 e streaming en Live Vuvuzela
O encontro entre Viaxes Amarelle FSF e Poio Pescamar FSF será emitido en directo a través da TVG2, así como da plataforma dixital da CRTVG g24.gal.
Tampouco faltará á cita a emisión por streaming a través da plataforma da Real Federación Española de Fútbol, que transmite todos os partidos desta categoría cada xornada e que está xestionado por Live Vuvuzela podendo seguir en directo o encontro a través da seguinte ligazón: https://youtu.be/wM8-6MEKPio.
