Loitouse ata o final do partido pero o CRAT Residencia Rialta saíu derrotado do Campo de Rugby Valle do Arcipreste diante do Rugby Majadahonda por 33-29. Así e todo, as galegas suman un punto de bonus defensivo que a pesar de ser moi importante sabe a pouco tras o gran partido realizado polas coruñesas.
O partido empezou ben para o CRAT Residencia Rialta con Ana Iglesias anotando un puntapié de castigo no minuto 4 de partido. Pronto, as madrileñas déronlle a volta ao marcador con dous ensaios de Denisse Gortazar e Alba Noa Castelán e as súas respectivas conversións de Cristina López. O ensaio de Maica Martí e a conversión de Ana Iglesias situaban o 14-10 no marcador.
Antes de que concluíse a primeira metade, as locais ampliaron a diferenza no luminoso con dous ensaios de Alicia Guio no 30 e Pilar Soria no 37, máis unha nova conversión de Cristina López. Cun 26 a 10 iriamos ao descanso no Val do Arcipreste.
O CRAT recurtou distancias no segundo acto
Xa na segunda metade, Macarena del Valle e Cristina López facían pensar que o partido estaba acabado co 33 a 10. As coruñesas non baixaron os brazos nin moito menos e confiaron no seu xogo. Maica Martí primeiro e Mariana Romero despois (cunha nova conversión de Ana) achegaba ao CRAT Residencia Rialta no marcador.
Un ensaio de Alejandra Fernández e outra conversión dunha Ana Iglesias inspirada facían pensar que a remontada era posible. Pero non había tempo para máis.
O CRAT Residencia Rialta, que quizais mereceu máis, perdeu por 33 a 29 en casa dun dos conxuntos favoritos na Liga Iberdrola de rugby. Amargo resultado a pesar das sensacións demostradas e un punto de bonus defensivo que pode ser moi importante para a clasificación na fase regular.
Por parte das visitantes, ademais das titulares entraron ao campo Claudia Barrio, Valle Viñas e Miriam Roig.
No conxunto coruñés xa están a pensar no próximo encontro que será no Estadio do Campus de Elviña o domingo 10 de decembro ás 12 horas fronte a Olímpico de Pozuelo.
