O Municipal de A Reigosa vivirá este domingo un partido de gran importancia para o Peluquería Mixta Friol. As lucenses queren sacar os 3 puntos na casa para saír dos postos comprometidos da táboa e poñer terra de por medio co descenso.
O presidente de Friol, Geluco Villar descatou, durante a previa, a complicada situación que vive o clube, 6 puntos por riba do descenso: “Somos conscientes de que estamos nunha situación complicada. Tiven que tomar a difícil decisión de prescindir de Daniel Guerrero. Tamén quero aclarar que as culpas da situación foron o 50%, non foi só do adestrador”, aclarou Geluco despois da destitución do pasado mércores do adestrador, Daniel Guerrero.
Villar farase cargo do conxunto galego e “de momento non temos decidido o novo adestrador. Ata despois do parón voume facer cargo eu do equipo. Temos varios nomes enriba da mesa pero unha vez xogado o partido da finde e durante o parón faremos todas as valoracións”.
O SE AEM, rival do Peluquería Mixta Friol o vindeiro domingo, ocupa a 4 posición na táboa e ven cunha boa dinámica de resultados: “O partido do domingo é complicado, máis se cabe despois do acontecido na semana pasada. Ímos loitar por sacar os 3 puntos ante un rival moi dificil que ven en boa dinámica”.
Debut soñado de Lucía Pardo coa Selección Española Promesas
Lucía Pardo está a ser a nota de cor de este ano no conxunto lucense. Ás súas grandes actuacións na Liga Reto Iberdrola hai que engadir o seu recente debut coa Selección Española Promesas (combinado de paso entre a sub-19 e a absoluta) que adornou cun golazo de vaselina. Foi o mellor tanto dos cinco que se puideron ver na Cidade do Fútbol de Las Rozas, no partido entre Promesas e a Selección Absoluta.
A futbolista de Outeiro de Rei deleitou aos presentes cunha extraordinaria vaselina desde uns 20 metros que asombrou a compañeiras e rivais nun partido que acabou con vitoria da selección principal por 3-2.
Un Geluco Villar moi ilusionado, non quixo deixar pasar a oportunidade de falar dunha das súas mellores xogadoras “Lucía Pardo é un referente para todo o clube e para toda a comarca lucense. Ela está moi ilusionada de poder adestrar coas mellores xogadoras do país. Lucía é un exemplo para toda a nosa canteira”.
