O Viaxes Amarelle FSF defenderá no duelo desta fin de semana o liderado do grupo 1 da Segunda División Nacional Feminina FS nun partido contra un dos rivais complicados e aspirantes a estar entre os tres equipos que disputen os play- off de ascenso, o UDC Txantrea KKE.
O UDC Txantrea KKE ocupa actualmente a quinta posición da xeral, con 12 puntos tras conseguir 3 vitorias, 3 empates e 2 derrotas nos oito enfrontamentos que leva disputados ata a data. É o terceiro equipo menos anotador da competición con 17 goles a favor; aínda que pola contra é o terceiro equipo que menos goles encaixa, con 14 goles en contra.
O conxunto navarro, está a ter uns resultados un tanto irregulares, empatando contra rivais da zona noble da táboa e cedendo unha derrota contra un rival da zona comprometida. De todos os xeitos os seus resultados, caracterízanse por ser todos eles moi axustados, e aínda que anotan poucos goles, compénsano con que son dos equipos que menos encaixan.
O equipo coruñés tras conseguir a clasificación para os oitavos de Copa de S.M. A Raíña FS a pasada fin de semana, regresa á competición regular cun partido contra un dos rivais que aspiran aos tres postos que dan opción a xogar o play- off de ascenso. A escuadra herculina pasa por un momento doce, e está coa motivación en punto alto, para poder seguir dando continuidade á súa serie de bos resultados e poder manter o primeiro posto da competición nacional.
O Viaxes Amarelle afrontrará a décima xornada este sábado 14 de decembro de 2019 ás 18:00 horas no Pavillón do Complexo Deportivo de Elviña I (A Coruña) enfrontándose ao UDC Txantrea KKE.
Xornada solidaria a favor da Asociación Protectora de animais APADAN
O club herculino continúa co seu afán de colaborar con entidades solidarias da cidade e área metropolitana, e para o partido desta fin de semana contra o UDC Txantrea KKE, abrirá unha hucha de colaboracións e donativos a favor da Asociación protectora APADAN, poñendo un entrada-donativo por unha cantidade simbólica de 1 €.
