Ata 18 atletas galegas sub18 finalizarán a tempada nesta fin de semana do 24 e 25 de xullo, no Campionato de España sub18.
Esta edición, posterior á celebrada en outubro de 2020 por mor da pandemia do COVID-19, celebrase sobre o sintético do Estadio Emilio Martín de Huelva.
As nosas 18 sub18
Entre as atletas galegas máis salientables en función das marcas acreditadas, destaca no sector de velocidade a participación da campioa de España de Pista cuberta Sub18 Ainhoa Reparaz do Val Miñor quen tomará parte nos 100 m. e nos 200 m. onde acude con serias opcións de podios en ambas distancias.
Na proba dos 400 metros, a nosa representante será Inés Vázquez, do CA Sada. Nos 800, poderemos ver a María Mato, do CA Santiago.
Dentro dos 1.500, a presenza galega estará protagonizada por Carolina Santos, do Ría Ferrol, mentres que nos 3.000 a participación irmandiña será dobre, con Anxela Seoane, do Ourense Atletismo, e con Laura Sánchez, do Atlética Lucense.
Nos obstáculos Sofía Gómez, do Riazor Coruña, competirá na distancia dos 2.000m., mentres que en marcha sobresáe a presenza de Salomé Segade do Millaraio sobre os 5.000m.
Dentro dos concursos o atletismo galego sub18 conta con moitas opcións como as que presenciaremos novamente en triplo salto entre Alba Cuns do Playas de Castellón e Diaou Diallo do Ría Ferrol, campioa e subcampioa de España de pista cuberta, quenes estarán pelexando polo título nacional con marcado acento galego.
Tal e como informa a Federación Galega de Atletismo, nos lanzamentos máxima atención á participación de dúas claras opcións á titulo nacional. Por unha banda no círculo de martelo estará Marta Neira do AVA quen acude ca mellor marca do ano de 59,27 m. Blanca Pereira, do Ourense Atletismo, e Eva Santos, do CA Sada, tamén estarán neste concurso.
Pola outra banda, a subcampioa de España de pista cuberta Xiana Lago do Ría Ferrol fará o propio no lanzamento de peso, ostentando tamén a mellor marca do ano con 15.09 m.
A campioa galega absoluta en peso e subcampioa en disco do Ría, tamén estará tomando parte, con seria opción de medalla, na proba de disco.
Outra das grandes bazas estará no sector de combinadas, na que a subcampioa de España indoor e plusmarquista galega, Lucía Sánchez del Valle da Atlética Lucense, acude co obxectivo de estar no máis alto do podio. Na mesma proba estará Carlota Salgado, do Atletismo Feminino Celta.
Do club lucense, Enma Sihuang estará competindo por un metal na colchoneta de altura ao igual que xa fixera na pista cuberta, na que obtivera o bronce nacional
No lanzamento de xavelina, a representante galega será Laura Rico do Ría, pelexando polos postos de finalistas nun concurso cun nivel moi alto de calidade entre as participantes.
