Burela vibra cun emocionante España – Xapón

Histórico e emocionante encontro entre a Selección Española de Fútbol Sala Feminino e Xapón. As gaitas de Dambara amenizaban o duelo e as máis de 800 almas que acudiron a Vista Alegre non deixaron de animar durante todo o encontro.

A burelista Ana Romero foi a encargada de defender a rede vermella neste segundo compromiso no que Peque, Jenny Lores e Luci tamén puideron deleitarse ante a bancada laranxa.

O fútbol da Selección marca tendencia e cóntanse cos dedos dunha man os rivais que aguantan o ritmo. Por suposto, sen falar da calidade individual. Por nomear só a algunhas: Ana Rivera, Vane Sotelo, Ana Luján, Amelia ou Peque marcan a diferenza no un contra un. E é entre estas dúas últimas como se desequilibra o marcador.

Un desmarque e posterior condución da xogadora de Burela acábao remanchando a de Futsi a un metro da liña de gol. O temperán tanto non afecta a formulación das asiáticas, envorcadas con máis afán que antes. Pero claro, a outra gran diferenza déixase notar baixo paus, cando é preciso. Se Cari deixaba a súa portería a cero no anterior encontro, onte a gardamallas do Pescados Rubén Burela, Ana Romero encárgase de facer estériles calquera das acometidas visitante. Por arriba, por abaixo ou co pés. É un muro.