A falta de dúas semanas para que Pontevedra acolla a segunda xornada da Copa de España feminina de estrada, a Federación Galega de Ciclismo (FCG) celebrou o pasado sábado na cidade do Lérez unha xornada de convivencia para ciclistas cadetes, juniors e sub23.
As corredoras de estrada supervisaron o percorrido da cita estatal que se disputará a finais deste mes e recibiron varias charlas, unha delas ofrecida por José Ramón Lillo-Bevia, Doutor en Ciencias da Actividade Física e do Deporte.
Adestramento e formación na xornada da FGC
A actividade mesturou adestramento e formación para as dezaseis participantes. Jacobo Ucha, técnico da FGC, reuniu ás ciclistas no Hotel Avenida e dende o cuartel xeral desta xornada arrancou o adestramento matinal. Baixo unha chuvia constante, este minipelotón feminino rodou por un trazado que ten como punto máis esixente a subida ao Alto da Porteliña. Os responsables federativos quedaron moi contentos coa actitude e o entusiasmo que mantivo o grupo ante unhas condicións climatolóxicas adversas. Unha vez completada a sesión, as corredoras compartiron mesa e mantel no comedor do hotel.
A convivencia continuou, informa a Federación, pola tarde co seu bloque formativo. O ponente convidado compartiu os seus coñecemementos impartindo a conferencia ‘Ciclo menstrual e rendemento’.
Ademais de José Ramón Lillo-Bevia, tamén Ucha, Juan Carlos Muñiz, presidente da FGC, e Francisco Javier Cajiao, vicepresidente, se dirixiron ás deportistas para explicarlles a planificación desta temporada e o método de traballo que se vai seguir. Deste xeito, concluíu a segunda xornada federativa do 2022, unha iniciativa posta en marcha a pasada campaña e que terá continuidade nas vindeiras semanas con ciclistas doutras modalidades.
